Në kryeqytetin hungarez u mbajtën tubime të ndara, teksa si partia në pushtet e kryeministrit Viktor Orban, ashtu edhe opozita, u përpoqën ta lidhin këtë ngjarje historike me sfidat dhe qëllimet politike që pritet të përcaktojnë zgjedhjet parlamentare të vitit të ardhshëm.
“Reuters” shkruan se dhjetëra mijëra mbështetës të Orbanit marshuan të enjten në Budapest për t’i shprehur përkrahjen liderit nacionalist në një ditë me rëndësi për Hungarinë, ndërsa ai po përballet me kërcënimin më serioz ndaj pushtetit të tij 15-vjeçar nga një parti opozitare pro-BE, në prag të zgjedhjeve të vitit 2026.
Përkujtimi i kryengritjes antisocialiste të vitit 1956, e cila u shtyp me forcë nga Ushtria e Kuqe, vjen në një moment të ndjeshëm për Orbanin, që ka kundërshtuar politikën e Bashkimit Evropian për t’i dhënë ndihmë ushtarake Ukrainës kundër pushtimit rus dhe ka ruajtur marrëdhënie të mira me Kremlinin, pavarësisht përpjekjeve të BE-së për ta izoluar Moskën.
Orban kishte shpresa të mëdha për mbajtjen e një samiti të paralajmëruar në Budapest midis presidentit amerikan Donald Trump dhe atij rus Vladimir Putin. Por të mërkurën në mbrëmje, Trump e anuloi samitin, duke përmendur mungesën e përparimit në përpjekjet diplomatike dhe ndjesinë se “koha nuk ishte e përshtatshme”. Ai vendosi gjithashtu sanksione ndaj dy kompanive më të mëdha ruse të naftës, për t’i prerë Moskës të ardhurat jetike. Hungaria varet shumë nga nafta ruse, dhe nuk ishte menjëherë e qartë nëse masat amerikane do të preknin furnizimet e saj.
Orban tha më herët të enjten se “ka ardhur dita e Marshimit të Paqes në Budapest.”
“Sot i dërgojmë një mesazh botës mbarë: Hungaria i thotë JO luftës! Ne nuk do të vdesim për Ukrainën. Nuk do t’i dërgojmë fëmijët tanë në therje me urdhrin e Brukselit,” shkroi Orban në rrjete sociale.
Ndërsa mbështetësit e tij kalonin lumin Danub, në të njëjtën ditë kur Bashkimi Evropian zhvillonte një samit në Bruksel, me një banderolë ku shkruhej “Nuk duam të vdesim për Ukrainën”, disa pjesëmarrës theksuan se mbrojtja e sovranitetit të Hungarisë është parësore.
“Sovraniteti i Hungarisë sot kërcënohet nga disa drejtime; sipas meje, rreziku më i madh vjen nga aspiratat imperialiste të Bashkimit Evropian,” tha Andras Kozak, një pjesëmarrës në marshim.
Orban pritet të përballet me zgjedhjet parlamentare në prill 2026, ku partia e re e qendrës së djathtë dhe pro-BE, Tisza, e drejtuar nga Peter Magyar, ish-zyrtar i qeverisë, kryeson shumicën e sondazheve.
Magyar e ka akuzuar Orbanin se po drejton një qeveri gjithnjë e më autoritare dhe të korruptuar. Qeveria i ka mohuar këto akuza, por Magyar ka arritur të preki pakënaqësinë e zgjedhësve ndaj Orbanit, veçanërisht në një periudhë kur ekonomia mezi po rritet pas goditjes nga inflacioni.
