Ministrat e Imigracionit dhe të Punëve të Brendshme të pesë vendeve anëtare të Bashkimit Evropian; Danimarkës, Gjermanisë, Greqisë, Austrisë dhe Holandës, janë takuar në Kopenhagen për të koordinuar hapat drejt finalizimit të marrëveshjeve me vende jashtë bllokut, me qëllim ngritjen e të ashtuquajturave “qendra kthimi” për emigrantët që u është refuzuar kërkesa për azil.
Gjatë takimit të zhvilluar ditën e premte, përfaqësuesit e të pesë shteteve konfirmuan se janë duke zhvilluar bisedime teknike me partnerë potencialë jashtë BE-së.
Duke shprehur vendosmërinë e bllokut për të ecur përpara me këtë plan, Ministri i Brendshëm gjerman, Alexander Dobrindt, deklaroi se “ne duam të arrijmë një marrëveshje me vendet e treta këtë vit”, duke konfirmuar gjithashtu se diskutimet teknike po vijojnë me vende jo-anëtare, megjithëse emrat e tyre nuk janë bërë publikisht të ditur.
Përfaqësuesit danezë dhe grekë theksuan se synojnë që këto struktura të bëhen plotësisht funksionale deri në vitin 2027. Lidhur me afatet e zbatimit, Ministri i Imigracionit dhe Integrimit i Danimarkës, Morten Bødskov, u shpreh se “nga ana daneze, ne presim të jemi gati të dërgojmë të huajt e parë në një vend partner deri në fund të vitit të ardhshëm”.
Po ashtu, duke arsyetuar nevojën e masave të tilla të rrepta, Bødskov nënvizoi se “ne nuk pranojmë që të huajt që qëndrojnë ilegalisht në Danimarkë të shpërblehen për shkak të vështirësive tona në kthimin e tyre”.
Kjo iniciativë pason miratimin e rregullave më të ashpra për migracionin nga Parlamenti Evropian në qershor, të cilat i hapën rrugën juridike krijimit të hapësirave të tilla të paraburgimit dhe administrimit jashtë kufijve të BE-së.
Modelime të ngjashme janë tentuar edhe më parë; Mbretëria e Bashkuar miratoi për një periudhë të shkurtër një plan me Ruandën përpara se të hiqte dorë pas ndryshimit të pushtetit, ndërsa Italia ka nënshkruar një marrëveshje paralele me Shqipërinë.
Përderisa qeveritë e përfshira e shohin këtë mekanizëm si një zgjidhje për menaxhimin e kthimeve dhe kontrollin e migracionit ilegal, plani i dërgimit të azilkërkuesve në vende jo-anëtare vazhdon të përballet me kundërshtime të forta nga organizatat ndërkombëtare për të drejtat e njeriut.
