Nëse AfD-ja do të merrte pushtetin në Saksoninë-Anhalt, përfshirja e fëmijëve me aftësi ndryshe në shkollat e zakonshme mund të vihej në pikëpyetje.
Partia e ekstremit të djathtë propozon rikthimin e shkollave speciale për nxënësit me nevoja të veçanta dhe klasa të ndara për migrantët.
Andreas Silbersack, drejtues i grupit parlamentar të FDP-së në land, shprehet veçanërisht i shqetësuar për djalin e tij 16-vjeçar, Viktor, i cili ka sindromën Daun dhe ndjek një shkollë të zakonshme. Ai frikësohet se djali mund të detyrohet të largohet nga shkolla, nëse AfD-ja zbaton programin e saj.
Në programin e AfD-së për arsimin parashikohet gjithashtu zëvendësimi i detyrimit për ndjekjen e shkollës me një “detyrim për arsimim”, që do të hapte rrugën për edukimin në shtëpi. Kritikët paralajmërojnë se kjo mund të përdoret për t’i larguar fëmijët nga arsimi publik dhe për t’i ekspozuar ndaj ideologjive ekstremiste.
Ekspertë të arsimit dhe përfshirjes paralajmërojnë se një politikë e tillë do të përbënte një hap të madh prapa për të drejtat e personave me aftësi ndryshe dhe për integrimin shoqëror. AfD-ja propozon gjithashtu kufizime ndaj programeve shkollore që promovojnë diversitetin, komunitetin LGBTQ+ dhe edukimin për demokracinë.
Në Gjermani, rreth 60% e fëmijëve me nevoja ndryshe pedagogjike vazhdojnë të ndjekin shkolla speciale, ndërsa një pjesë e madhe e prindërve shprehen në favor të arsimit gjithëpërfshirës. Kritika kryesore është se ndarja e fëmijëve me aftësi të kufizuara mund të çojë në përjashtim social dhe në mundësi më të kufizuara gjatë jetës.
