18 dhjetori 2018 ishte dita e fundit, kur Jose Mourinho u kthye në mesnatë në “Lowry Hotel”, shtëpinë e tij gjatë qëndrimit në stolin e Manchester United, pasi u shkarkua nga Ed Woodward, drejtori ekzekutiv i “Djajve të Kuq”. Sidoqoftë, kjo lamtumirë nga Premier League nuk ishte përfundimtare. Këtë të mërkurë, më 20 nëntor 2019, plot 336 ditë pas shkarkimit të tij, Mourinho ka gjetur një projekt tjetër për t’ia rifilluar. Që kur u largua nga Manchester United, ai shkoi për të jetuar në Londër, në rezidencën e tij, në “Belgravia”, me gruan dhe dy fëmijët. Pikërisht situata e tij sentimentale, më shumë sesa lajmet e punës, ka qenë fokusi kryesor i shtypit britanik për portugezin, javëve të fundit.
Pasi e fotografuan dy javë më parë duke u larguar nga shtëpia pa unazën e fejesës, tabloidët spekuluan për një “tërmet” të mundshëm në shtëpinë e tij. Edhe pse në realitet këto thashetheme e kanë shoqëruar atë gjatë viteve të fundit, që nga koha e tij në Madrid, duke qëndruar i vetmuar edhe në Manchester, në Londër ka jetuar me familjen e tij. Në mungesë të angazhimit në stolin e ndonjë skuadre nga 18 dhjetori i vitit të kaluar, Mourinho ishte treguar aktiv në drejtime të tjera. Sezonin e kaluar filloi të shfaqej në televizionet angleze, në rolin e opinionistit për çështjet aktuale dhe ndeshje të caktuara futbolli.
Që nga nisja e këtij sezoni, “Sky Sports” e bëri atë komentator stabël të tij. Portugezi nuk pranoi të fliste në këtë eksperiencë televizive për Manchester United, si shenjë e mbrojtjes së trashëgimisë së tij në këtë klub. Të vetmen herë që foli për “Djajtë e Kuq”, Mourinho vazhdoi të fajësojë bordin drejtues: “Unë isha i vendosur të bëja përforcime të reja, por askush nuk më kushtoi vëmendje. Këtë vit, të paktën mbërriti Maguire, një lojtar që më pëlqen”. Në fakt, është e zakonshme që çdo deklaratë e portugezit të bëhet titull i madh në shtyp, të nesërmen.
“Akoma shpresoj të më uroni, kur ju dhashë titullin në vitin 2014”, – tha “live” një ditë “Special One” për Vincent Kompany, duke iu referuar momentit kur Chelsea mundi Liverpool, një rezultat që dërgoi “ujë në mullirin” e Manchester City. Portugezi pati një “fërkim” edhe me Jürgen Klopp, ditën kur gjermani dhe të tijtë shkuan në “Old Trafford” këtë sezon. Trajneri i “Reds” akuzoi Manchester United se mendonte vetëm për t’u mbrojtur, kur luante kundër tyre. “Atij nuk i pëlqente menuja. Ai donte mish, unë i jepja peshk”, – iu përgjigj Mourinho.
Në këtë drejtim, portugezi nuk ndalet së qenuri më i miri. Që kur u largua nga Manchester United, ai njoftoi se ka qëllim të rivalorizohej në Premier League. Mundësia e Real Madridit mbeti gjithmonë aty, diçka që portugezi do ta dëshironte. Një vit më parë, pasi humbi punën në “Old Trafford”, ai përjashtoi një rikthim të shpejtë në Premier League. Sidoqoftë, edhe sot e kësaj dite, Mourinho mbeti mjaft i pëlqyer për mjedisin mediatik të Anglisë, i cili nisi të fliste për një kthim të tij të shpejtë e të qartë së fundi.
Para Tottenham, emri i Mourinho është lidhur gjatë muajve të fundit me stolin e Arsenalit. Problemet e Unai Emery për të ruajtur harmoninë e grupit dhe situata e “Topçinjve” në klasifikim linin të kuptonin një shkarkim të mundshëm të spanjollit. Sidoqoftë, aura që e shoqëronte ishte zhdukur. “Bagazhet e Mourinho janë një tarifë që nuk ia vlen të paguhet, edhe nëse i rregullon problemet e Arsenalit për një kohë të shkurtër”, – shkroi Daniel Taylor në “The Athletic”. “Dorëzimi i çelësave të shtëpisë së Arsenalit te Jose do të ishte një veprim i rrezikshëm”, – shkroi “The Independent”. Më i ashpër ishte “The Mirror”: “Zgjedhja e Jose Mourinho nuk është përgjigjja e duhur për Arsenalin. Ai do të prishte 15 vite punë të një filozofie dhe mënyrës së të bërit të gjërave në këtë klub”.
Sidoqoftë, portugezi është sërish pjesë e Premier League. Ai është rikthyer në krye të nënkampionëve të Europës. Pothuajse një vit më parë ai tha një “mirupafshim” plot dashamirësi për paparacët e Manchesterit, duke nënkuptuar se nuk ishte puna e tij e fundit në botën e futbollit. Dukej qartë se herët a vonë ai do të kthehej, siç u dëshmua me emërimin si trajner i Tottenham. Mbetet për tu parë nëse do të vazhdojë të jetë “Special One”. E qartë është se, në një mënyrë apo tjetër, Jose Mourinho nuk do të pushojë së ekzistuari kurrë…/telesport
g.kosovari
