Kryetari i Kuvendit, Ilir Meta, priti të enjten ministrin e Jashtëm çek, Lubomír Zaorálek, me të cilin bisedoi rreth forcimit të marrëdhënieve dypalëshe dhe situatës në rajon. Meta theksoi se marrëdhëniet e shkëlqyera mes dy vendeve dhe simpatia reciproke, që ekziston mes dy kombeve tona, duhen ngritur në një nivel më të lartë bashkëpunimi, veçanërisht në drejtim të shkëmbimeve ekonomike e tregtare.
Ministri Zaorálek vlerësoi rolin stabilizues të Shqipërisë në rajonin e Ballkanit dhe theksoi se nën Presidencën Çeke të Grupit të Vishegradit, do të punohet për intensifikimin e bashkëpunimit jo vetëm në planin dypalësh, por edhe në kuadër të projekteve rajonale.
Duke biseduar mbi procesin e integrimit evropian, kryeparlamentari Meta shprehu besim se klasa politike shqiptare do të arrijë konsensusin e duhur për miratimin sa më shpejt të ndryshimeve kushtetuese të nevojshme për reformimin e sistemit të drejtësisë, ndërkohë që ministri Zaorálek shprehu mbështetjen e Republikës Çeke për avancimin e integrimit evropian të Shqipërisë.
Në përfundim, Meta dhe Zaorálek diskutuan mbi zhvillimet e fundit në rajon duke ndarë bindjen se Ballkani ka nevojë për stabilitet politik, zhvillim të qëndrueshëm ekonomik dhe për një të ardhme të sigurt brenda BE-së.
Ministri i Jashtëm çek ndodhet në Tiranë në kuadër të pjesëmarrjes në takimin e ministrave të Jashtëm të vendeve të rajonit të Ballkanit Perëndimor.
