Kreu i Kuvendit Ilir Meta ndodhet në Berlin ku u takua me kreun e Bundestagut gjerman Norbert Lammert.
Z. Meta shprehu vendosmërinë e tij për avancimin me zbatimin e reformës në drejtësi dhe përmbushjen e të gjitha rekomandimeve të KE-së.
“Shqipëria duhet të vazhdojë me implementimin e reformave të nisura sipas standardeve evropiane. Shqipëria mund të mbështetet te përkrahja e Gjermanisë, ashtu si edhe në të kaluarën”, u shpreh z. Lammert.
Të dy bashkëbiseduesit e konsideruan procesin e Berlinit si kycc për të motivuar dhe për të ruajtur prespektivën integruese të Ballkanit në BE.
Pyetje: Z. Meta sapo përfunduat një takim me homologun gjerman zotin Lamert. Për çfarë biseduat?
Meta: Ishte kënaqësi e veçantë për mua të pritesha nga Presidenti i Bundestagut, Prof. Lammert dhe ta njihja atë me zhvillimet pozitive në vend pas vizitës së tij në pranverë.
Në veçanti me votimin konsensual të reformës në drejtësi dhe me vendosmërinë tonë për të ecur drejt zbatimit të kësaj reforme mjaft të rëndësishme jo vetëm për forcimin e shtetit ligjor në vend, por njëkohësisht edhe për procesin e integrimit evropian.
Gjithashtu, edhe për të ndarë kënaqësinë e një rekomandimi pozitiv të Komisionit Evropian për të inkurajuar hapjen e negociatave midis Shqipërisë dhe Bashkimit Evropian në momentin që ne do të tregojmë edhe më tej progres në zbatimin e kësaj reforme, por edhe të gjithë prioritete të tjera me BE-në.
Ne mbështetemi fuqimisht në përkrahjen e Gjermanisë dhe të Bundestagut për të ardhmen evropiane të Shqipërisë dhe jemi të bindur që me progresin që do të realizojmë në të ardhmen do ta meritojmë këtë mbështetje.
Presidenti i Bundestagut Gjerman Prof. Dr. Norbert Lammert
Pyetje: Cilat janë pritshmëritë tuaja për palën shqiptare në të ardhmen?
Lammert: Një vazhdim konsekuent të rrugës së përshkuar bashkërisht gjatë viteve të fundit. Vetë vizita e Kryetarit të Kuvendit të Shqipërisë, z. Meta është një tjetër tregues, se sa të ngushta janë marrëdhëniet mes dy vendeve tona në vitet e fundit.
Ka patur kaq shumë vizita në të dyja kahet, si nga ana e parlamenteve ashtu dhe nga përfaqësues të qeverive, sa të krijohet ndjesia se Shqipëria është tashmë prej kohësh një anëtare jo formale e klubit.
Për sa i takon anëtarësimit konkret në Bashkimin Evropian, Shqipëria mund të mbështetet te Gjermania, sikurse e theksova dhe gjatë takimit tonë, edhe për perspektivën e hapjes në parim të negociatave të anëtarësimit, por duhen përmbushur kriteret. Pa një dëshmi të përmbushjes së detyrimeve të marrëveshjes nuk mund të ketë anëtarësim dhe ne mbështesim me kënaqësi të gjitha përpjekjet, në veçanti në parlamentin shqiptar, në kuadër të përmbushjes së detyrimeve ligjore, në mënyrë që negociatat e anëtarësimit të miratohen, pasi edhe ato kërkojnë kohën e tyre, me shpresën për të patur një përfundim të suksesshëm.
/a.k
