Presidenti i zgjedhur Ilir Meta ka vijuar sërish sulmet politike ndaj Edi Ramës dhe Rilindjes. Gjatë mitingut përmbyllës në Durrës, Meta ka shtuar akuzat per trafikun e drogës në vend
Ish-kreu i LSI vijoj akuzat ndaj policisë së shtetit, e cila sipas tij është e lidhur me bandat e drogës. Meta tha se në portin e Durrësit fiken skanerat e doganave kur kalon droga.
“Avioni i drogës u rrëzua në Ishëm se ishte ngarkuar më shumë se duhet. Qytetarët futen në burg për dritat, por për aeroportin e Ishmit nuk u ndëshkua askush. Policia u bë palë me bandat. Të gjithë e dinë se kush i fik skanerat e doganave kur kalon droga për në Itali. Ajo që u paraqit si rilindje ishte mavija e krimit dhe korrupsionit”, tha Meta.
‘’Ka ikur koha kur Shqipëria qeveriset me tuta dhe batuta’’, tha Presidenti i zgjedhur duke ironizuar veshjen e kryeministrit dhe fushatën e tij.
Kryetari i Kuvendit në detyrë sulmoi Ramën dhe Bashën, duke thënë se nuk eshte në garë as me Tomin dhe as me Xherrin.
“Nuk ka garë as me Tomin as me Xherrin. Më 25 qershor ka vetëm garë mes LSI të Tiranës, Durrësit, Fierit etj. LSI force e parë në Tiranë, Durës dhe Fier. Në Gjirokastër Tomi dhe Xherri duan të lënë pa votuar komunitetin grek. Nuk jemi në garë as me humbësit dhe as me frikacakët. Nuk do ketë më “mavi” që do të thotë t’u japësh shtetin oligarkëve.Edhe 3 ditë, për 1 milion grushta kundër oligarkisë dhe pabesisë”, tha Meta.
“Banditët e rilindjes me armë në dorë dhe nën mbrojtjen e shefave të policië dhunojnë simpatizantët e LSI”, tha Meta
Ish-kryetari i LSI deklaroi se Rama do të humbë më keq se Berisha në referendumin e vitit 1994.
“Kreu i mavisë do ta pësojë me keq se Berisha në vitin 1994. Edhe 72 orë dhe Shqipëria do të shërohet nga sëmundja më e rëndë që përjetoi në 4 vjet”, tha Meta./javanews.al/a.ç
