Që nga rënia e regjimit të Milosheviçit, në marrëdhëniet midis Shqipërisë dhe Serbisë, ka nisur një fazë e re. Ky ka qenë theksi I vënë nga Kryetari i Kuvendit, Ilir Meta në Forumin “Shqipëria dhe Serbia drejt një së ardhmeje të përbashkët në Bashkimin Evropian”, organizuar nga Instituti Shqiptar i Studimeve Ndërkombëtare së bashku me Forumin për Marrëdhëniet Ndërkombëtare të Lëvizjes Evropiane për Serbinë. Të pranishëm në këtë aktivitet ishin dhe Ambasadori i Republikës Federale të Gjermanisë, z. Hellmut Hoffman, z. Albert Rakipi-Drejtor i Institutit Shqiptar të Studimeve Ndërkombëtare, znj. Jelica Minic, Presidente e Forumit Qendra për Marrëdhëniet Ndërkombëtare të Lëvizjes Evropiane për Serbinë, ekspertë për çështjet ndërkombëtare, analistë dhe drejtues të pushtetit vendor.
Në fjalën e tij përshëndetëse, Meta theksoi se dinamika e marrëdhënieve midis Shqipërisë dhe Serbisë duhet të ishte shumë më e fortë.
“Që nga momenti ku Milosheviçi u largua dhe Serbia nisi një fazë të re, kur po bëhen gati 16 vite, nuk jemi aty ku duhet të ishim sepse jemi ende peng të viteve të së kaluarës, të sjelljeve tipike që janë pasojë e luftës së ftohtë. Dhe mendoj që për dy vendet që e kanë realisht sot objektiv integrimin evropian, dinamika e kësaj marrëdhënie duhet të ishte shumë më e forte, shumë më e qëndrueshme”, ka nënvizuar Meta.
Sipas tij, ka një ngadalësi në gjithë krijimin e kuadrit ligjor në marrëdhëniet mes dy vendeve, nuk janë nënshkruar ende, nuk janë miratuan apo ratifikuar as gjysma e marrëveshjeve që janë propozuar nga Shqipëria në vitin 2002, që është krejtësisht jo normale, kur interesi është i përbashkët dhe kur nuk ka një arsye pse të vononin. Kryetari i Kuvendit u shpreh se politika duhet t’i japë një rol më të madh të rinjve në të dy vendet.
“Mua më ka lënë një përshtypje të jashtëzakonshme në kohën kur ndodhi ndeshja e futbollit në Shqipëri dhe një pjesë e mediave serbe kërkonin të krijonim incidente të pa ndodhura, ndërsa studentët nga Serbia që erdhën për të parë ndeshjen këtu, kur u pyetën nga mediat serbe dhanë përshtypjet më të mira dhe përgënjeshtruan atë propagandë të papërgjegjshme që ishte bërë për të krijuar një atmosferë të paqenë. Të rinjtë padyshim janë më pa komplekse dhe nuk janë të ngarkuar me historitë e të kaluarës. Kështu që unë besoj se ne jemi në një rrugë të drejtë dhe jemi në një rrugë të mirë, por kemi një shpejtësi që lë për të dëshiruar”, tha Meta.
Kryetari i Kuvendit tha se vendet mund të faktorizohen jo duke e demonizuar njëri-tjetrin, por përkundrazi, vetëm duke bashkëpunuar.
“Dhe në këtë drejtim marrëdhëniet e Shqipërisë me Serbisë marrin një rol shumë të madh sepse nuk janë thjeshtë marrëdhënie midis Shqipërisë dhe Serbisë, por janë marrëdhënie më të gjerë që reflektojmë midis shqiptarëve dhe serbëve kudo në rajon, por edhe më gjerë, shqiptarëve dhe sllavëve”, tha Meta duke shtuar se tashmë ndërgjegjësimi është arritur, por shpejtësia e absorbimit të kësaj filozofie dhe angazhimi për rezultate praktike konkrete, duhet të jetë shumë më i madh dhe shumë më i gjerë.
Kreu i Kuvendit me këtë rast ka nënvizuar se mezi pret të bëj një vizitë në Beograd si Kryetar i Parlamentit. Sipas tij, rajoni është bërë shumë më i vogël se sa ka qenë dhe vetëm duke bashkëpunuar ne mund të faktorizohemi, jo vetëm Shqipëria me Serbinë, por të gjithë vendet e tjera.
(javanews.al) Me. Ar
