Kryetari i LSI –së, Ilir Meta nuk e ka kapërdirë dot humbjen e kandidates së Diana Mile për Bashkinë e Pogradecit. Në një konferencë për mediat, Meta ka paralajmëruar shkrirjen e strukturave drejtuesve të Pogradecit.
“Do të nisë nga një organizim i të gjithë LSI –së së Pogradecit. Përgjegjësinë do ta kërkojmë në radhë të parë nga strukturat tona atje. Na sollën një zhgënjim të madh, jo në raport me ne, por me qytetarët. Në fillim të javës së ardhme do të nisim në të gjithë vendin organizimin, duke nisur me LSI –në e Pogradecit”, deklaroi Meta.
Ai tha se opozita u përpoq të cenojë procesin zgjedhor të 21 Qershorit dhe për këtë, LSI, forca politike që ai drejton, kishte paralajmëruar më herët publikun dhe ndërkombëtarët.
“LSI, si forcë e përgjegjshme dhe serioze, shqetësohet për mbarëvajtjen e demokracisë dhe standardeve zgjedhore në Shqipëri, për cenimin e të cilave kishim paralajmëruar ndërkombëtarët se do të bëhej gjithçka për t’i cenuar nga opozita, që për fat të keq është akoma e çoroditur dhe në drejtim të paditur”, tha Meta, duke shtuar se pavarësisht kësaj, qytetarët votuan me qytetari dhe kulturë.
Meta thirri këtë të premte mbledhjen e parë të kryesisë së partisë për të analizuar rezultatin e 21 Qershorit, të cilin Meta e vlerësoi si tejet të suksesshëm për LSI-në, me përjashtim të Pogradecit.
