Kryetari i Kuvendit, Ilir Meta, bëri të ditur sot se thirrja e seancës parlamentare për miratimin e 7 ligjeve që kanë të bëjnë me vettingun, zgjedhjen e qeverisjes së gjyqësorit dhe të prokurorisë speciale, do të jetë në varësi të ecurisë së punës në komisionin e posaçëm parlamentarë për Reformën në Drejtësi. Gjatë një prononcimi të posaçëm për mediat pak minuta më parë ai u shpreh se komisioni për reformën është duke punuar dhe duke vazhduar në vijim të seancës së mëparshme.
“Aëtarët e komisioneve po njihen dhe me opinionet e ekspertëve ndërkombëtarë. Shpresojmë të vazhdojë në mënyrë suksesive. Do dëshëroja të thërrasë shumë shpejt seancën por jemi në varësi të ecurisë së punës së komisionit. Dëshëroj me këtë rast të nënvizoj që të intensifikohet puna edhe për 2 ligjet e tjera për të cilat kemi rënë dakord që të diskutohen dhe të miratohen brenda muajit gusht. Shumë shpejt shpresojmë të fiksojmë datën për miratimin e ligjit për vettingun”, u shpreh Meta.
Kreu i Kuvendit me këtë rast u shfaq përmbajtur sa i përket përcaktimit të një date fikse, lidhur me thirrjen e seancës parlamentare, pasi, sipas tij, duhen parë paraprakisht përfundimet e mbledhjes së komisionit për reformën. “Duhen parë diferencat sa afër dhe sa larg konsensusit jemi. Pas kësaj do të gjykojmë mbi mundësinë për thirrjen e mbledhjes së kryetarëve të grupeve parlamentare”, u shpreh Meta.
Kryeparlamentari ka nënvizuar edhe një herë me këtë rast se qëndrimi i tij në lidhje me Reformën është që të vijohet me linjën e konsensusit. “Nuk besoj se opozita do të bllokojë konsensusin në mënyrë të qëllimshme. E rëndësishme është që të mos cënohet ecuria. PD mund të ndjekë rrugë të tjera për të kontestuar këto ligje, apo mund t’i drejtohet Komisionit të Venecias. Nëse nuk jep konsensus do të jetë përgjegjësi e PD”, theksoi Meta.
Me. Ar
