Nga mbledhja e kryesisë së LSI, kreu i saj Ilir Meta është shprehur se vlerëson protestën paqësore të PD-së, por shpreh shqetësimin përkundrejt një sërë mesazhesh që janë kundër dialogut politik dhe funksionimit normal të parlamentit, si dhe vazhdimësisë së reformave zgjedhore e në drejtësi.
Më fjalë të tjera Meta ka kritikuar qëndrimin bojkotues të opozitës e cila ka vendosur që të mos vijë në parlament dhe të mos kërkojë asnjë dialog politik përveçse zgjedhjes së një qeverie teknike.
“E vlerësoj protestën për mënyrën paqësore, por shpreh shqetësim për çdo mendim që nuk i shërben dialogut politik, funksionit të parlamentit dhe vazhdimësisë së reformave kyçe, asaj zgjedhore dhe në drejtësi.”-ishte mesazhi I Metës.
“Shpreh angazhimin e LSI por edhe timin si kryetar i saj dhe kryetar i Kuvendit për të dhënë kontributin tonë maksimal për një klimë sa më bashkëpunuese, sepse e ardhmja e vendit tonë në BE, që duhet inkurajuar më shumë se asnjëherë tjetër, kërkon dy elementë kyç, zbatim të vettingut në mënyrë kushtetuese, dhe një klimë konstruktive mirëbesimi dhe garanci maksimale për standardin më të lartë që duhet të arrijnë zgjedhjet e 18 qershoret. Janë kyç për hapjen e negociatave por edhe për zbatimin e reformës në drejtësi në një terren të sigurt dhe tërësisht legjitim”, ka thënë Meta./java/a.k
