Gjatë intervistës së djeshme në News 24, Ilir Meta ka folur edhe rreth akuzave që i janë bërë atij për pronat që zotëron. Ai reagon duke futur në përgjigjen e tij edhe vilën e vajzes së Berishës në gjirin e Lalzit. Ja përgjigja e Metës:
Motoja juaj ‘me qetësi dhe dashuri’, por nuk ishit as i qetë dhe as i dashur me gazetaren e VOA-s?
Ju e keni parë vetë?
Po e kam parë.
Unë kam qenë në një studio shumë të hapur. Mua nuk më shqetëson asgjë, se kam dëgjuar gjëra shumë më të mëdha dhe më të rënda. Mua më shqetëson që shpërdorohet një studio e tillë. Mua më shqetëson mungesa e profesionalizmit. Unë nuk bëj kompromise me gazetarin, mos më pyet këtë, mos më pyet atë. Por kur një gazetare thotë që raporti thotë kështu dhe raporti nuk thotë ashtu, kur thotë keni makinë të shtrenjtë dhe unë nuk kam asnjë makinë personale. Kur thotë që keni shtëpi në Lalëz, kur e kam prej kohësh dhe ky qenka problem i madh që i bën pushimet në Sarandë, në Velipojë, por jo në Dubai, në Maldive? Një politikan që nuk di të lozë as baste, as kazino… Një politikan që përgojohet në mënyrë kaq joprofesionale… Pronat që ka bashkëshortja ime dhe nëna e saj me të cilën jetojmë janë 7-8 herë më të mëdha se dy apartamentet që kemi ne. Ishte mungesë e madhe e përgjegjësisë. Mendoj që edhe mediat duhet të kenë profesionalizëm.
Ideja ishte të pyeste nëse është i pasur apo i varfër Ilir Meta?
Pasuria ime më e madhe është fjala ime, po, jo. Punën e pronave, i keni, kontrollojini. Pasuria që ka të ligjshme në pronën e saj bashkëshortja ime me nënën e saj është 7 apo 8 herë më shumë se sipërfaqja e shtëpive në Tiranë dhe Lalëz. Vila e Berishës, e Argitës, është kaq dhe aq. Kjo është e turpshme që merren. Në çfarë standardesh po bëjmë politikë dhe transparencë… Kur ka marrë ajo shtëpi, atje s’kishte as rrugë. Vlera e asaj ishte pothuajse asgjë. Ne jetojmë në një vend me spekulime. S’mund të them se jam i varfër, kam 20 e ca vjet në politikë, kam qenë kryeministër, por nuk harroj nga vij. Kam lindur në një fshat 1300 metra mbi nivelin e detit. Nuk e kam problem për të jetuar, por kam mjaft kushërinj edhe të papunë dhe ndonjëherë i tallin se si je kushëriri i tij dhe si s’të ndihmon. Por unë nuk e harroj nga vij.
Korrupsioni është problem që duhet zgjidhur…
Ju me profesionalizëm, ne me transparencë, por jo me spekulime e keqinformime.
Ju po thoni se s’ka politikanë me prona të pajustifikuara…
S’mund ta them kurrë që s’ka politikanë të pakorruptuar, por e kam të vështirë që vetësatanizohemi se shqiptarët janë më të korruptuarit e ndërkombëtarët janë më të kulluarit. Kjo është shumë e gabuar. Duhet të zhvillojmë transparencën dhe standardet.
