Një fjalim plot insinuata ka qenë ai i kryetarit të Kuvendit, Ilir Meta, në hapje të seancës së parlamentit, ku nuk kanë munguar artikulimet kërcënuese për stabilitetin, por edhe kërcënimet për çuarjen e draftit në Gjykatën Kushtetuese. Por ajo që ka rënë në sy ka qenë fakti i lidhjes së karriges së tij si kryetar Kuvendi, me mënyrën sesi do të votojë Berisha apo Topalli. Sipas Metës, nëse nuk votojnë pro reformës edhe Berisha dhe Topalli nuk do të rri më si kryetar Kuvendi. Një kushtëzim ky që në fakat parathotë jo pak gjëra ku ajo që bie në sy është se Meta pas votimit të Reformës do të largohet nga qeveria.
“Konsensusi është i rëndësishëm sepse kjo është Kushtetutë e re e Shqipërisë, që nuk duhet të votohet në mënyrë të njëanshme, sepse ka të bëjë me Shqipërinë në 30 vitet që vijnë. Është bërë një punë e jashtëzakonshme dhe duhet të përmbyllet me sukses”, tha Meta.
Kreu i Kuvendit tha se kjo reformë nuk mund të miratohet pa opozitën dhe shtoi se për këtë Lulzim Basha është në kontakt të vazhdueshëm me Ambasadën Amerikane.
Megjithatë, kjo seancë nuk do të mbyllet pa miratimin e reformës në drejtësi, tha Meta.
Ndërkohë, kjo seancë plenare po ndiqet nga afër nga dy aktorët kryesorë ndërkombëtarë të reformës në drejtësi, ambasadori amerikan Donald Lu dhe ambasadorja e BE-së, Romana Vllahutin, ndërsa jashtë sallës një grup qytetarësh protestojnë për miratimin e reformës.
