Kryetari i Lëvizjes Socialiste për Integrim, Ilir Meta, gjatë një takimi me strukturat e Njësisë 8 në Tiranë, u shpreh se për kandidatët për deputetë për zgjedhjet e ardhshme do të kërkohet mendimi i çdo anëtari të partisë, kudo në të gjithë vendin.
“Ne besojmë se shqiptarët jo vetëm që duhet të votojnë, por mbi të gjitha duhet të zgjedhin. Duhet të zgjedhin jo vetëm mes partive, por të kenë mundësi të zgjedhin brenda një force politike kandidatët që ata besojnë më shumë dhe që do të bëjnë më shumë për qytetarët në të ardhmen. LSI për listat që do të paraqesë për kandidatët për deputet do të kërkojë mendimin e çdo anëtari të saj kudo në të gjithë vendin”, deklaroi Meta.
“Të gjithë duhet të shprehen për kandidatët më të mirë dhe më të drejtë që do të përfaqësojnë më mirë interesat e qytetarëve shqiptarë, vijoi ai, të atyre që besojnë dhe votojnë për LSI-në dhe vlerat që ajo mbron, të cilët do të demonstrojnë një përkushtim më të madh për interesin publik dhe për interesin qytetar dhe që do të shkojnë në Kuvendin e Shqipërisë për të mbrojtur interesat e qytetarëve dhe programin politik e qeverisës të LSI-së, u shpreh Meta, ndërsa shtoi se në këtë mënyrë do t’u jepet më shumë përgjegjësi anëtarëve, por edhe deputetëve. /b.d
