Kryetari i Lëvizjes Socialiste për Integrim ka komentuar zhvillimet brenda mazhorancës dhe zërat për përçarjen e koalicionit. Në një prononcim për Zërin e Amerikës ai ka komentuar edhe procesin për miratimin e reformës në drejtësi, duke theksuar se opozita kishte të drejtë për rekomandimin 88, ndaj ai këmbënguli për konsensus deri në fund. Meta tha se kuptoi që opozita kishte të drejtë pas takimit që zhvilloi me kryeopozitarin Lulzim Basha.
“Mund të ishin harxhuar më pak energji për të siguruar konsensusin. Dua t’u siguroj se unë si kreu i Kuvendit dhe LSI kemi qenë për konsensusin. Dhe ne do të votonim edhe pa opozitën sipas “Venecias”. Mund ta them pa droje se procesi përfundoi mrekullisht. Opozita kishte plotësisht të drejtë për rekomandimin numër 88, këtë ja kam shprehur edhe partnerëve të koalicionit. Dhe po të vëmë re, ardhja e zonjës Nuland, e cila punoi qartë se duhet punuar për konsensusin, por edhe ndërhyrjet e ambasadorëve bënë të mundur një votim që mund të quhet konsensus patriotik që nuk duhet helmuar me deklarata. Le të vazhdojmë sipas atij votimi patriotik në mënyrë që ajo ditë që lindi në mesnatën e 21, 22 korrikut të ndryshojë rrugën e Shqipërisë për të arritur konsensusin”, tha Meta.
Më tej ai ka komentuar edhe përplasjet brenda koalicionit, i pyetur nga gazetari i Zërit të Amerikës.
“Unë kam qenë ai politikan që kam qenë në koalicion me Berishën për të liberalizuar vizat, por kur ka ardhur momenti që ëhstë krijuar konflikt me NATO-n për një ligj, kam dalë me kritika. Unë mund të kem vënë në diskutim qeverinë dhe pozicionin tim, por asnjëherë nuk kam vënë në diskutim reformën në drejtësi. Jam i lumtur që jam sot në SHBA dhe mund t’u them gjithë kolegëve amerikanë, mund t’i themi zonjës Nuland, se ne do të vijojmë konsensusin për ligjin për Vetingun, dhe ligjet e tjera sepse kjo reformë nuk duhet të ketë dorën e politikës. Më pas politikanët, duhet të shkojnë të përgjigjen para drejtësisë. Unë e kam thënë nuk bëhet reforma duke i thënë kudënrshtarit do shkosh ti në burg. Por bëhet duke i thënë do shkoj unë i pari në burg”, tha Meta.
Ilir Meta u pyet edhe për koalicionin me Partinë Socialiste dhe dhënien e konsensusit për reformën në Drejtësi.
“Unë dua të siguroj të gjithë socialistët që unë jam ai njeri që i qëndroj marrëveshjeve. Duke qenë se politika jonë është e ngarkuar me intriga, jam gati të iki para grupit parlamentar të PS që t’i sqaroj për qëndrimet tona. Po ashtu ftoj Ramën të bëjë të njëjtën gjë, por nuk duhet të ngatërrohen çështje si reforma në Drejtësi me koalicionet” – tha Meta.
I pyetur nësë bashkëqeverisja PS-LSI do të vijojë, Meta tha se janë të gjitha mundësitë që mandati 4-vjeçar të përmbyllet sëbashku me PS duke e përmirësuar qeverisjen.
