Kreu i LSI dhe kryeparlamentari Ilir Meta në fjalën e tij para të rinjve të LRI në Pallatin e Sportit “Asllan Rusi” ka deklaruar se “vendi nuk ka asnjë minutë për të humbur me arrogancën e njërës palë dhe ultimatumin e tjetrës”.
“E ardhmja e vendit nuk mund të merret peng nga ata që duan më shumë pushtetin sesa paqen sociale. Nuk kemi asnjë minutë për të humbur me arrogancën e njërës palë dhe ultimatumet e palës tjetër për t’i dhënë Shqipërisë zgjedhje të lira”, deklaroi Meta.
Meta konfirmoi edhe njëherë se është i gatshëm të lërë postin e kryeparlamentarit dhe të gjitha portofolet e LSI në shërbim të zgjidhjes së ngërçit politik, për të mos u bërë turpi i Evropës.
“Nuk na dhimbsen as karriket tona për ti dhënë një zgjidhje Shqipërisë dhe shqiptarëve dhe për të mos u bërë turpi i Evropës. Kemi detyrim të bëjmë çdo gjë. E ardhmja e të rinjve nuk mund të mbahet peng nga arroganca dhe kokëfortësia. LSI është forca që ka promovuar më shumë të rinj”, deklaroi Meta.
Meta tha se ndihet krenar për numrin e madh të të rinjve që janë pjesë e LSI dhe se fuqia e tyre nuk do të lejojë marrjen peng të demokracisë
“Fuqia e të rinjve nuk do lejojë askënd të marrë peng demokracinë dhe zgjedhjet në vend”, tha Meta
Meta sulmoi edhe reformën në arsim, duke thënë se “ekonominë e dijes nuk mund ta realizojmë nëse vrasim ëndrrën qoftë edhe të një maturanti”.
“Detyrimi ynë madhor është të investojmë te edukimi i rinisë, pasi vetëm kështu Shqipëria do të jetë e sigurtë në lidershipin tuaj“, tha Meta.
Më tej, Meta tha se “të gjithë kërkojmë një Shqipëri pa drogë dhe për një Parlament që përfaqëson qytetarët dhe jo krimin e organizuar”.
“Nuk ka nevojë Shqipëria për deputetë me rekorde kriminale dhe as për deputete biznesmene që vijnë për tendera dhe për t’i vënë gjoba parlamentit”, tha kreu i LSI
Meta: Jo zgjedhje “One man show”
Meta ka theksuar se zgjedhjet duhet të jenë të lira dhe të gjithëpranuara dhe jo “shfaqje” nga “One man show”.
“Nuk do lejojmë kurrë që zgjedhjet e lira dhe demokracia të bëhen kurban në këtë vend. Që lira e medias të mos kthehet në farsë e që drejtësia të mos kapet nga askush. Jemi sot më të vendosur, më shuam se kurrë që vendin ta çojmë drejt zgjedhjeve të lira e të gjithëpranuara. Zgjedhjet nuk janë “One man show”, por shans për të gjithë“./javanews.al
c.a
