Kryetari i Kuvendit të Shqipërisë Ilir Meta tha se është keqkuptuar qëllimi i iniciativës së qeverisë për të dënuar deri në tre vjet burg shpifjen ndaj zyrtarëve të lartë. Kryeparlamentari tha se ky keqkuptim mes qëllimit dhe formulimit të nenit do të zgjidhet dhe do të ketë reflektim.
Z. Meta, ç’mendim keni për propozimin e fundit të qeverisë për dënim të shpifjes të zyrtarëve të lartë?
Jam në dijeni të këtij debati të iniciativës, besoj se ka një keqkuptim midis qëllimit të kësaj iniciative dhe të mënyrës se si ka funksionuar formulimi, kështu besoj se ky keqkuptim do të zgjidhet, do të ketë një reflektim.
LSI e ka përshëndetur dekriminalizimin e shpifjes në kohën e qeverisë Berisha?
Besoj që LSI mbështet çdo iniciativë për dekriminalizim apo jo. Jua thashë që kam përshtypjen që është keqkuptuar qëllimi me formulimin. Kështu që do ketë reflektim besoj.
Këto deklarata kreu i Lëvizjes Socialiste për Integrim i dha duke ju përgjigjur interesit të gazetarëve, pasi mori pjesë në një tryezë për krizën e refugjatëve.
Në nenin që qeveria kërkon të ndryshohet nuk specifikohet se cila kategori e personave përfshihen në dënimin për shpifjen ndaj funksionarëve të lartë të shtetit dhe të zgjedhurve.
