Kreu i shtetit Ilir Meta ka nisur një vizitë dyditore në Kosovë, ku është takuar ditën e sotme me homologun e tij Hashim Thaçi.
Vizita nis me takimin kokë më kokë mes dy krerëve të shtetit, e më pas me bisedimet dypalëshe mes delegacioneve respektive zyrtare. Më pas, Meta dhe Thaçi dolën në një konferencë të përbashkët për mediat.
Meta e vuri theksin te liberalizimi i vizave për Kosovën. Ai tha se është vendim i padrejtë për të kushtëzuar çështjen e demarkacionit me liberalizimin e vizave.
““Lidhur me liberalizimin e vizave nuk mund të ketë moment më të vështirë për Presidentin e Shqipërisë, pasi ka kërkesa pafund nga personalitete për të marrë nënshtetësinë dhe qëllimi kryesor është t’i shpëtojmë kësaj bllokade. Kam pasur një takim me drejtorin e Përgjithshëm për Zgjerimin dhe me personalitete të tjera, me të cilët kemi theksuar domosdoshmërinë e dhënies fund këtij izolimi, diskriminimi që po përjetojnë qytetarët e Kosovës, pasi janë të vetmit në Ballkanin Perëndimor që nuk e gëzojnë këtë mundësi. Besoj se vendimi është i padrejtë për të kushtëzuar çështjen e vizave me Demarkacionin. BE nuk duhet të harrojë se politika e zgjerimit ka qenë katalizator i proceseve transformuese, i forcimit të sigurisë dhe paqes e stabilitetit në rajon. Kjo politikë e zgjerimit duhet të vazhdojë dhe mendoj se sinjali i parë është liberalizimi i vizave të Kosovës, e cila ka plotësuar kushtet”, theksoi Meta”
Takimi i radhës do të jetë me kryeministrin Ramush Haradinaj, kreun e Kuvendit, Kadri Vevseli, zv.kryeministrin e Parë dhe ministrin e Jashtëm, Behgjet Pacolli.
Vizita e parë shtetërore e Presidentit të Republikës së Shqipërisë në Kosovë përmban edhe takimi me krerët e partive parlamentare si dhe homazhe te Varri i Presidentit Ibrahim Rugova dhe në Kompleksin e Memorialit “Adem Jashari” në Prekaz-Skënderaj.
Dokumenti
Me heret, Thaci në takimin që zhvilloi sot me homologun e tij nga Shqipëria, kanë nënshkruar një dokument, përmes së cilit janë dakorduar për shumë çështje me rëndësi për të dyja vendet.
Në këtë dokument, të dy presidentët u pajtuan që të përshpejtojnë proceset e integrimit të të gjitha vendeve të rajonit që dëshirojnë të anëtarësohen në BE dhe NATO.
Hartimin e një dokumenti strategjik për anëtarësimin e plotë të Kosovës në BE dhe NATO.
Liberalizimin sa më të shpejtë të vizave ndërmjet BE-së dhe Kosovës, si dhe angazhimin e Kosovës që të bëjë çdo përpjekje të zgjidhë në mirëbesim dhe mirëkuptim çështjet që lidhen me marrëveshjen për shënjimin e vijës kufitare me Malin e Zi.
Po ashtu, edhe vazhdimin e fazës përfundimtare të dialogut ndërmjet Kosovës dhe Serbisë.
