Kryetari i Kuvendit, Ilir Meta, ka marrë pjesë sot në Konferencën e 25-të Vjetore te ACEEEO që po zhvillohet në Tiranë me temë “Zhvillimi i sistemeve dhe proceseve zgjedhore në 25 vitet e fundit”.
Meta në fjalën e tij tha se “Ndërsa flasim shpesh për standarde bashkëkohore dhe europiane, duhet të mos harrojmë se parimet bazë të kulturës zgjedhore europiane kanë rëndësi thelbësore për konsolidimin e çdo aspekti zgjedhor në Shqipëri, duke treguar trasparencë, besueshmëri, qëndrueshmëri dhe rezultate të prekshme në drejtim të standardeve që duhen arritur”.
“Forcimi i rolit të KQZ-së si një institucion i pavarur dhe profesional për organizmin dhe menaxhimin e zgjedhjeve eshte bere në përputhje me rekomandimet e OSBE-ODIHR-it dhe kodit të praktikave të mira në çeshtjet zgjedhore është kyç. Dua të shpreh një falenderim të vaçantë për rolin e OSBE-ODIHR-it që ka luajtur dhe vazhdon të luaje në monitorimin e proceseve zgjedhore, por edhe në rekomadimet që hartohen për autoritetet dhe institucionet e vendit tonë”, tha Meta.
Në vijim, Meta pohoi se “Dua të shpreh mbështetjen e plotë për përshpejtimin e punës të Komisionit të Posacem Parlamentar për Reformën Zgjedhore dhe për këtë qëllim i kemi kërkuar edhe zyrtarisht misionit të ODIHR-it dhe Komisionit të Venecias që të ofrojnë kontributin e tyre për zbatimin e rekomandimeve. Vitin e ardhshëm në vendin tonë do të mbahen zgjedhjet e përgjithshme politike, ndaj ky komision në zbatim të kodit të praktikës së mirë të çeshtjeve zgjedhore të Komisionit të Venecias, duhet të përfundojë sa më parë punën e tij në bazë të rekomandimeve te ODIHR-it për zgjedhjet në Shqipëri, të orientuar nga parimet e trashëgimisë zgjedhore europiane, por dhe të shfrytëzojë idete dhe praktikat më të mira që ekzistojnë”.
“Gjatë muajt qershor pata kënaqësinë të takoj një grup deputetësh përfaqësues të 48 partive parlamentare dhe jo parlamentare, të cilët i janë drejtuar Kuvendit të Shqipërisë me nismen ligjore për ndryshimet në Kodin Zgjedhor në kuadër të angazhimeve tona për një reformë zgjedhore. Është e qartë nga eksperienca shqiptare e këtyre viteve të fundit se administrimi i procesit zgjedhor kërkon rritje te mëtejshme të pavarësisë, paanësisë dhe kapacitetit profesional të gjithë trupave të administrimit zgjedhor dhe në mënyrë të vecantë të komisioneve zgjedhore, si dhe rolit që duhet të realizojë teknologjia për një votim elektronik”, tha Meta.
Në përfundim, Meta tha se “Inkurajoj përpjekjet e KQZ-së për më tepër bashkëpunim dhe transparencë dhe për një administratë zgjedhore të depolitizuar duke mbështetur ndryshimet në Kodin Zgjedhor në përputhje me rekomondimet e OSBE-ODIHR-it, për t’i mundësuar të gjithë qytetareve shqiptarë një votim të drejtë, të barabartë, të padeformuar, ashtu sic e meriton një vend kandidat për anetarësimin në BE”. /
