Kryetari i Kuvendit dhe i Lëvizjes Soclialiste për Integrim, Ilir Meta, deklaron partia e tij është e e gatshme ta votojë Byronë Kombëtare të Hetimit, kur të jenë gati PS dhe PD.
Në një intervistë në televizionin News 24, Meta theksoi rëndësinë e akordit mes palëve, për të garantuar funksionimin efikas të Byrosë së Hetimit, duke u shprehur se nuk ka rëndësi se në varësi të kujt do të jetë ky institucion.
“Ngritja e Byrosë Së Hetimit varet nga opozita. Nëse opozita pranon, jemi gati ta formalizojmë që tani. Nuk e kam në duart e mia draftin e SHBA-së. LSI favorizon çdo draft që lufton korrupsionin”, deklaroi Meta.
Dje pasdite keni patur një takim dy orësh me koalicionin, njësia e koordinimit siç njihet ndryshe, ku ka patur tema nga më të ndryshmet, për marrëveshjen me FMN, për bujqësinë, për reformën në drejtësi, por edhe për Byronë Kombëtare të Hetimit. A patët dje një vendimmarrje për afatet se kur mund të ngrihet kjo Byro?
Tema kryesore ka qenë diskutimi lidhur me ecurinë e ekonomisë dhe të reformave, diskutimi për këtë çështje kaq të rëndësishme, ka ndodhur në një moment mjaft pozitiv, kur Standard & Poor’s ka rritur vlerësimin, për performancën e ekonomisë sonë. Eshtë një lajm shumë pozitiv, sepse rrit besueshmërinë e ekonomisë shqiptare ndaj tregjeve financiare, ndaj investitorëve të huaj.
Kur do ta shohim të ngritur Byronë e Hetimit?
Unë besoj se kjo është një çështje që më shumë varet prej opozitës se sa prej maxhorancës.
Në fakt, në seancën e së enjtes, ju i kërkuat opozitës që të depozitojë një projekt të vetin, përsa i përket Byrosë Kombëtare të hetimit, a do të merret me përparësi, nëse PD e depoziton një projekt për Byronë?
Absolutisht që çdo iniciativë do të ndiqet me përparësi, sikurse e kemi treguar edhe në të kaluarën, për iniciativat e opozitës. E rëndësishme është që ajo është bashkuar me këtë ide.
A ka LSI një qëndrim, përsa i përket Byrosë Kombëtare të Hetimit, në varësi të kujt duhet të jetë?
Kjo nuk është çështja më e rëndësishme. Për LSI është e rëndësishme të kemi një dakordësim, për atë variant që garanton funksionimin efikas të kësaj strukture.
LSI cilin draft do favorizonte?
LSI favorizon çdo zgjidhje konsensuale, që respekton parimet kushtetuese dhe njëkohësisht që garanton që kjo agjenci e konsolidon shtyllën e hetimit, sepse kjo është shumë e rëndësishme, dhe rrit efektivitetin në luftën kundër korrupsionit dhe krimit të organizuar.
A do të pranojë LSI-ja një reformë në drejtësi pa vërejtjet që i ka dërguar Komisionit të Venecias?
Për LSI, fryma e rekomandimeve të Komisionit të Venecias, ka qenë dhe mbetet tepër e rëndësishme. Ajo jep garanci për të ruajtur themelet e Kushtetutës tonë.
Pra do pranoni atë çfarë do vendosë Komisioni i Venecias?
Ne kemi thënë me kohë, që për ne gjykatësi suprem i standardit të kësaj reforme është Komisioni i Venecias.
Balkanweb
