Duke folur në pritje e organizuar nga kreu i Komisionit të Reformës, Ilir Meta falenderoi veçanërisht Fatmir Xhafajn si iniciator i eventit. Më parë, Xhafaj dhe Meta janë parë të buzëqeshur me njëri-tjetrin, pavarësisht përplasjeve të ashpra që patën në Komision para miratimit të reformës në Drejtësi.
“Një falenderim akoma të veçantë e kam edhe për Bylykbashin dhe anëtarët e tjerë të komisionit që janë ende duke punuar për vettingun” – tha Meta duke ironizuar mungesën e opozitës në aktivitet.
Ai e ka cilësuar si një konsensus të paparë arritjen e 21 Korrikut në Kuvendin e Shqipërisë. Sipas Metës, konsensusi do të ishte i pamundur pa Komisionin e Venecias.
