Nga Armando Meta
Çështja e koalicionit të 18 qershorit duket se ka nxjerrë në pah standardet e dyfishta që ndjek kryetari i LSI, Ilir Meta, lidhur me këtë çështje. Nga njëra anë ai ka një përgjigje ‘hazër xhevap” sa i përket qëndrimit lidhur me PD-në sa i përket koalicionit. Ndërsa në lidhje me PS ai gjithnjë ka zgjedhur si retorikë përgjigjen se “do të duhet të mbledhë forumet e LSI për të marrë një vendim”. Prej shumë javësh drejtues të lartë të PS, duke filluar që nga kryeministri Rama e më poshtë, janë deklaruar se mirëpresin një rinovim të aleancës me LSI për zgjedhjet e qershorit. Ftesa ka qenë e kthjellët, pasi është e kuptueshme se mbi bazën e këtij vizatimi si PS ashtu edhe LSI në koalicion, do të duhet të skicojnë rrugën që do të ndjekin për të qenë fitues në zgjedhjet e 18 qershorit. Këto zgjedhje përbëjnë një sfidë me jo pak të panjohura pas 4 vitesh qeverisje si për PS ashtu edhe për LSI, po të kihen parasysh edhe një sërë reformash me jo pak kosto që janë ndërmarrë në harkun e këtyre 4 viteve. Atëhere çfarë e pengon LSI për të marrë një vendim? Nëse në rastin e përjashtimit të koalicionit me PD, vendim për të cilin Meta duket se nuk ka nevojë të mbledhë forumet, në rastin e PS ‘gjë e gjëzën’ ai e zhvillon me forumet. Duke pasur parasysh mënyrën sesi trajtohen forumet nga lidershipi politik në Shqipëri, është lehtësisht e kuptueshme se ato janë tërësisht formale. Vendimet i marrin kryetarët. Loja me forumet hapet vetëm atëhere kur kryetarët ose kërkojnë të rrisin ‘pazarin’ ose janë në pritje të një oferte më të mirë nga pala tjetër. PS dhe LSI kanë qeverisur vendin për 4 vitet e fundit. Duket pak e ‘habitshme’ që lidershipi i LSI ende nuk e ka të qartë se cili ka qenë rezultati i kësaj bashkëqeverisje që ngurron të marrë një vendim. Loja me forumet është thjeshtë pasqyra për të kuptuar se politika nga ideologji tashmë është kthyer në biznes.
