Kryetari i Kuvendit, Ilir Meta, në një intervistë dhënë për gazetën “Illyria”, beson se në ditët e ardhshme do të përmbyllet procesi i dekriminalizimit, në mënyrë që të gjitha energjitë të përqendrohen pastaj tek reforma në drejtësi.
Duke i cilësuar dekriminalizimin dhe reformën në drejtësi si reforma kyçe për çeljen e negociatave me Bashkimin Evropian, Meta beson se në ditët e ardhshme do të arrihet një marrëveshje përfundimtare me opozitën, pasi të dyja draftet janë pothuajse të përbashkëta në gati 95% të propozimeve.
Lidhur me akuzat për çështjen ÇEZ, Kryetari i Kuvendit u shpreh se “kam qenë dhe jam i hapur për çdo hetim shqiptar dhe ndërkombëtar, për çdo çështje konkrete”. Ai shtoi se, “çdo forcë politike, apo cilido që ka një shqetësim për çështje që kanë të bëjnë me korrupsionin apo me shkeljen e ligjit duhet të ndjekë një rrugë institucionale”. Por sipas Metës, “përpjekjet për të politizuar çështje të tilla, absolutisht që nuk i shërbejnë as zbardhjes së të vërtetës dhe as daljes së përgjegjësisë së askujt”.
I pyetur mbi raportet me Kryeministrin Edi Rama, ai shtoi se “kjo është një marrëdhënie e vazhdueshme, e përditshme, ku e rëndësishme është që drejtimet kryesore strategjike janë të dakordësuara”. Sipas Metës, “çdo debat i ditës nuk konteston dhe nuk vë në pikëpyetje këto raporte, nuk vë në pikëpyetje këtë koalicion”.
“Shpeshherë shohim që deputetë, po themi të Partisë Socialiste, mund të kenë vërejtjet e tyre. Natyrisht që ka një dëshirë, që sa herë mund të ketë një qëndrim qoftë edhe paksa të ndryshëm të përfaqësuesve të LSI-së, menjëherë të ketë një interes të madh mediatik për ta paraqitur si një problem të madh të koalicionit. Kjo shpjegohet edhe me dëshirën e mediave për të prodhuar ndonjëherë lajme më sensacionale dhe për t’iu shmangur argumentit që jepet gjatë këtij debati. Ne jemi pjesë e këtij koalicioni, jemi pjesë e kësaj mazhorance dhe synojmë që ajo çdo ditë të përmirësohet dhe ka mjaft hapësirë për t’u përmirësuar”, tha ai.
Duke komentuar situatën e fundit në Kosovë, Kryetari i Kuvendit shprehu bindjen se “ka shumë rrugë përmes dialogut për të dalë nga kjo situatë”. “Besoj se kurrsesi kjo situatë komprometuese nuk ndihmon në kthjellimin e argumenteve politike, juridike, kushtetuese për të ecur përpara. Përkundrazi, është një situatë, që i mjegullon të gjithë argumentet e tjera edhe nuk ndihmon për ecjen e qartë dhe solide të afirmimit të shtetit të Kosovës dhe forcimit të institucioneve të saj dhe njëkohësisht të integrimit evropian dhe euro-atlantik të Kosovës”, tha ai.
ATSH
Teksti i plotë i intervistës mund të lexohet në këtë link:
Meta: Ç’ndodh me Shqipërinë, Kosovën, shqiptarët, Ballkanin (video, audio, foto)
