Kryetari i Kuvendit, Ilir Meta gjatë takimit të mërkurën me Drejtorin e Përgjithshëm për Zgjerimin në KE, Christian Danielsson, nënvizoi rëndësinë e dialogut politik dhe klimës bashkëpunuese në parlament me qëllim shmangien e vonesave të panevojshme në axhendën evropiane të vendit.
Gjatë bisedës me zyrtarin europian rreth rekomandimeve të progres-raportit të fundit të KE-së për Shqipërinë, kryeparlamentari vuri në dukje se rekomandimi pozitiv për çeljen e bisedimeve për anëtarësim në BE reflekton përpjekjet e Shqipërisë për të avancuar në rrugëtimin e saj evropian.
Meta theksoi se Kuvendi e ka lexuar progres-raportin me kujdes të veçantë dhe të gjithë rekomandimet e Komisionit do të reflektohen në Planin e Veprimit të Kuvendit të Shqipërisë. Ai nënvizoi gjithashtu se dialogu politik është shumë i rëndësishëm për mbarëvajtjen e një klime bashkëpunuese në parlament me qëllim shmangien e vonesave të panevojshme për axhendën evropiane të vendit, e cila duhet të qëndrojë mbi axhendat e ngushta politike apo elektorale.
Drejtori Danielsson e siguroi kryetarin e parlamentit për mbështetjen e plotë të Komisionit ndaj përpjekjeve të Kuvendit në drejtim të bashkëpunimit politik, garantimit të gjithë-përfshirjes dhe forcimit të bashkëpunimit me shoqërinë civile dhe institucionet e pavarura.
Në përfundim, u diskutua mbi zhvillimet në rajon dhe u nda bindja se stabiliteti i Ballkanit ka rëndësi jo vetëm për qytetarët në rajon, por edhe për sigurinë e të gjithë Bashkimit Evropian. /a.m.
