Kuvendi shtyu për të premten punimet e seancës së sotme plenare, e cila nuk arriti të zhvillohej, për t’iu lënë negociatorëve të maxhorancës dhe opozitës që të gjenin mirëkuptim për çështjet e padakortësuara në paketën nënligjore të ligjit të ‘dekriminalizimit’.
Pas fjalës që mbajti në mbrëmje në parlament, Përfaqësuesja e Lartë për Politikën e Jashtme në BE, Federica Mogherini, kryetari i Kuvendit, Ilir Meta njoftoi deputetët për vijimin të premten të punimeve të seancës së sotme.
Në një prononcim për mediat, Kryeparlamentari Ilir Meta shprehu besimin se konsensusi është arritur dhe nëse ka ndonjë mendim për ndonjë çështje që s’është thelbësore, besoj që kemi kohë për ta përmbyllur këtë me sukses deri nesër paradite.
Meta apeloi për të bashkuar forcat për të ecur më shpejt në të gjitha reformat kryesore sidomos ato të drejtësisë dhe njëkohësisht për të pasur një frymë më konstruktive.
Sa i takon akteve nënligjore të dekriminalizimit, Meta tha se “sot është punuar gjatë gjithë ditës, nesër është moment duhur për të përmbyllur. Ftoj të gjithë që edhe duke patur në konsideratë mesazhet kaq të rëndësishme për bashkëpunimin që dha Mogherini në Kuvend të bashkojmë forcat për të ecur më shpejt në të gjitha reformat kryesore sidomos ato të drejtësisë dhe njëkohësisht për të pasur një frymë më konstruktiv”.
Përsa i takon kërkesës së PD-së për amendimin e ligjit të dekriminalizimit Meta u shpreh se pozita ka të drejtën e saj të ndërmarrë çdo iniciativë por për çështjen që ne flasim duhet të miratojmë një vendim. “Të mos zhvendosim debatin nga një detyrim imediat që Kuvendi ka në çështje të tjera pasi kuvendi ka për detyrë të respektojë afatet dhe detyrimet e tij në zbatim të këtij ligji. Respektojmë çdo kërkesë të drejtë por çdo kërkesë duhet të ecë në shinat e rregullores konsensuale”, deklaroi kryeparlamentari Meta
