“Mësuesit po aq të rëndësishëm sa ushtria”, Rama: Pagën mesatare të arsimtarëve do ta bëjmë 1250 euro!

Kryeministri Edi Rama premtoi se brenda kësaj dekade paga mesatare për mësuesit do të jetë 1250 euro.

Sipas tij kjo është plotësisht e arritshme, ndërsa u shpreh i vetëdijshëm që puna e mësuesve sa vjen dhe vështirësohet.

Ai tha se mësuesit nuk kanë lodhje fizike, por vështirësia e tyre është psikologjike.

“Mësuesit janë po aq të rëndësishëm sa ushtria, sepse janë një trup e cila përballjen do ta kenë më të egër. Prandaj janë një trup që duhet të mbështet dhe vlerësohet, të ngrihet në piedestal. Duhet të gjejmë rrugë dhe mënyra dhe kjo mund të behet më e lehtë nëse rrisim nivelin e dëgjimit ndaj mësuesve, që të ndjerit në mision mos jetë vetëm cështje page, por të shkojë përtej kësaj”, tha ndër të tjera Rama.

Rama: Vështirësia në punën e mësuesve nuk shkon duke u ulur, por duke u rritur. Nuk është një vështirësi fizike, por është një vështirësi pune psikologjike. Plani ynë është që në vitet e ardhshme, brenda kësaj dekade ne pagën mesatare të mësuesve do ta çojmë 1250 euro. Është e bëshme, nuk besoj se do të kemi problem me këtë, ndërkohë që sic foli kryetarja në detyre e bashkisë, sic foli ministrja, pjesa tjetër e përmirësimit të kushteve në shkolla shkon në favor të rritjes së dëshirës për të shkuar në punë.