Mësuesit kundër testimit, Sindikata: I panevojshëm, ata kanë një diplomë
Sindikata e Pavarur e Arsimit të Tiranës iu ka dalë në mbrojtje mësuesve shqiptarë duke kundërshtuar testimin që iu kërkohet në dhjetor për aftësi në punë. Kryetarja e Sindikatës për Tiranën Anila Kosova tha dje gjatë një konference se mësuesit janë të diplomuar dhe iu janë nënshtruar provimeve të kualifikimit që bëhen çdo 5 vjet, 10 vjet dhe 20 vjet, ndaj dhe ky testim i ri është i panevojshëm.
“Mësuesit janë kundër testimit, është diskutuar dhe disa herë, unë jam prononcuar dhe në media për këtë pjesë. Testimi i mësuesve është i panevojshëm, e kemi ngritur këtë problematikë por gjithsesi nga Ministria e Arsimit është thënë para pak ditësh që testimi do bëhet në dhjetor, por pjesa më e madhe e mësuesve nuk është dakord me këtë testim. Sepse është një testim i panevojshëm pasi mësuesit kualifikohen çdo 5, 10 dhe 20 vjet. Kështu që ky është një testim i panevojshëm për mësuesit, dhe pjesa dërrmuese e tyre nuk do që të testohet sepse nuk mendoj që nëpërmjet testimit do të rankohen mësuesit dhe do të themi kush është mësuesi më i mirë dhe kush është mësuesi më i dobët. Tashmë mësuesit janë në pozicionet e tyre, kanë marrë një diplomë dhe sigurisht dinë ta zotërojnë atë çka japin në klasë tek nxënësit,” thotë Anila Kosova, kryetare e Sindikatës së Arsimit të Tiranës.
Për të diskutuar të gjitha këto problematika dhe shqetësime në prag të nisjes së vitit të ri shkollor 2015-2016, mësuesit u mblodhën dje në një konferencë të jashtëzakonshme në Tiranë. Krahas testimit ata ngritën si shqetësim edhe mungesën e kontratave të punës, pa të cilën nuk kanë aspak siguri në punë.
