Një javë pas përmbytjeve katastrofike në Nepal, të cilat kanë shkaktuar më shumë se 1,000 viktima, ekipet e shpëtimit kanë nxjerrë të gjallë 119 persona, mes tyre edhe një shtetas britanik.
Lajmi është konfirmuar nga një zëdhënës i ushtrisë britanike, ndërsa identiteti i shtetasit britanik të shpëtuar ende nuk është bërë i ditur.
Sipas BBC, nga shtetasit nepalezë të shpëtuar, 44 janë gra dhe 74 janë burra.
Megjithatë, situata mbetet kritike. Më shumë se 3,900 persona rezultojnë ende të zhdukur pas katastrofës natyrore. Mes tyre janë edhe mbi 600 punëtorë, të cilët dyshohet se kanë mbetur të bllokuar në një rrjet të gjerë tunelesh të mbushura me baltë, në kuadër të projekteve hidroenergjetike përgjatë lumit Trishuli.
Kryeministri i Nepalit, Balendra Shah, deklaroi të hënën se 279 persona ishin shpëtuar nga zonat e prekura nga përmbytjet.
Operacioni masiv i kërkim-shpëtimit po koordinohet nga personel ushtarak kinez dhe nepalez, ndërsa në operacion marrin pjesë edhe ekspertë nga India, Koreja e Jugut dhe Australia.
Fatkeqësia goditi distriktin Rasuwa, në veri të kryeqytetit Katmandu, të mërkurën në mëngjes.
Fillimisht u raportua se përmbytjet mund të ishin shkaktuar nga një tërmet. Megjithatë, analizat e mëtejshme të Shërbimit Gjeologjik të SHBA-së (USGS) sugjeruan se aktiviteti sizmik ishte shkaktuar nga një rrëshqitje dheu.
Sipas të dhënave të publikuara nga agjencia amerikane, një ngjarje sizmike me magnitudë 5.2 u regjistrua pranë kufirit në orën 08:37 sipas kohës lokale.
Ajo lidhet me një kombinim të shembjes së akullnajave dhe rrjedhjes masive të mbeturinave.
