Pas ndryshimit të rregullores në procedurat e emërimit të arsimtarëve, Ministria e Arsimit dhe Sportit do të zhvillojë për të dytin vit testimin e punësimit. Procesi, që tashmë është në fazën e parë, do të finalizohet në muajin dhjetor, kur në një ditë të vetme të gjithë aplikuesit që dorëzojnë dokumentacionin e rregullt, do t’i nënshtrohen provimit. Rregullorja që ka hyrë në fuqi dje, sqaron etapat, në të cilat do të kalojë procesi, si dhe formatin e testit. Gjithashtu, në të përcaktohen edhe llojet e testeve, bashkë me formatin përkatës, shkruan sot gazeta Shekulli.
Llojet e testeve
Sipas udhëzimit të ri të Ministrisë së Arsimit, do të jenë 5 lloje testesh, që do të shpërndahen për kandidatët, specifikisht sipas profilit që ata aplikojnë për punë. Kështu, për këtë vit, MAS ka vendosur që ata të jenë përkatësisht,
- a) Test i arsimit parashkollor;
- b) Test i arsimit fillor;
- c) Test për profilet: gjuhë shqipe dhe letërsi, gjuhë angleze, gjuhë frënge, gjuhë italiane, gjuhë gjermane, matematikë, fizikë, biologji, kimi, histori, gjeografi, teknologji informacioni dhe komunikimi (TIK), shkenca shoqërore, ekonomi, edukim fizik, muzikë, art pamor, si dhe profile të tjera specifike brenda planit arsimor, sipas kërkesave nga njësitë arsimore vendore;
- d) Test për degët muzikë, art pamor dhe balet në kulturën profesionale në shkollat artistike;
- e) Test i përgjithshëm për mësuesit e kulturës profesionale në arsimin special. Por, në përmbajtje, secili prej tyre do të hartohet me dy pjesë. Pjesa e parë përmban dokumentet zyrtare që kanë të bëjnë me veprimtarinë e mësuesve, programet lëndore përkatëse, metodologjinë e mësimdhënies dhe të të nxënit, në përgjithësi dhe të lëndës, etikën dhe komunikimin e mësuesit në institucionit arsimor, aspekte të drejtshkrimit të gjuhës shqipe. Ndërkohë, pjesa e dytë shpall përmbajtjen shkencore të lëndës sipas programit orientues përkatës.
Programet orientuese
Sa u përket programeve orientuese sipas të gjithë profileve, ata do të hartohen nga Instituti i Zhvillimit të Arsimit, dhe do të vihen në shërbim të kandidatëve, në faqen online të IZHA-s dhe portalit të krijuar enkas për emërimet, “Mësues për Shqipërinë”.
Programet orientuese për secilin profil, do të bazohen në mësimore dhe lëndore përkatëse. Ndërkohë, formula e vlerësimit do të jetë e njëjtë, me atë të vitit të kaluar, ku vlerësimi përfundimtar i kandidatit bëhet me sistemin e 70 pikëve, i cili përbëhet nga pikët e pjesës së parë të testit (30 pikë) dhe nga pikët e pjesës së dytë të testit (40 pikë). Me rregullat e reja të shpallura nga MAS, kandidatët që marrin nivelin maksimal të pikëve në testim, jo detyrimisht do të renditen në krye të listës, pasi ato do të kombinohen edhe me pikët e fituara nga dosja.
Kjo e fundit plotësohet gjatë karrierës, me pikët e kualifikimit, punimeve shkencore, përvojës, dëshmi të gjuhës së huaj etj. Ndërkohë, me zyrtarizimin e rregullores, bëhet e ditur se, emërimi i mësuesve, i cili kalon në 3 faza, (konkurrim me dosje, konkurrim në portalin “Mësues për Shqipërinë”, zgjedhje e vendit të punës), dhe në të do të marrin pjesë, vetëm ata kandidatë që janë kualifikuar në fazën e parë të konkurrimit nga vlerësimi me dosje.
Ndërsa, komisioni që do të ngrihet pas marrjes së rezultateve të testimit, do të hartojë listën e kandidatëve për çdo profil apo lëndë dhe rendit kandidatët sipas pikëve të grumbulluara testim. Pas përfundimit të afateve të ankimimit, komisioni do të bëjë edhe renditjen e kandidatëve, sipas pikëve totale.
Aplikimi
Për t’u regjistruar në testim, kandidati paraqet dosjen në njësinë arsimore vendore nëpërmjet shërbimit postar. Mbi bazën e vlerësimit të dosjes nga komisioni i vlerësimit, i ngritur në njësinë arsimore vendore, kandidati pajiset nga Zyra Arsimore me formularin e pranimit për të marrë pjesë në fazën e dytë të konkurrimit.
Kandidati regjistrohet online në portalin “Mësues për Shqipërinë” dhe plotëson çdo rubrikë të detyrueshme të portalit, me qëllim pjesëmarrjeje në testim. Qendrat e testimit ngrihen në çdo drejtori arsimore rajonale (DAR). Ndërkohë, ndryshe nga testimi profesional që po zhvillohet aktualisht, testimi i punësimit do të zhvillohet në të gjithë vendin brenda një dite dhe në të njëjtën orë.
SHEKULLI
