Trafikim narkotikësh nga Shqipëria në Finlandë. Është ky aktiviteti i katër grupeve kriminale, me drejtues shqiptarë, që është shkatërruar falë bashkëpunimit mes Strukturës së Posaçme AntiKorrupsion dhe autoriteteve nordike të drejtësisë.
Siç bën me dije gazetarja e Klan News, Glidona Daci, dy nga krerët e grupeve kriminale janë nga Vlora. Është zbuluar po ashtu se dy drejtuesit e tjerë të këtij grupi janë nga Kuçova e Berati, por me banim në kryeqytet. Operacioni është zhvilluar 24 orët e fundit, ndërkohë që në pranga kanë rënë vetëm nëntë prej shqiptarëve. Njëri nga ata që është shpallur në kërkim, dyshohet të jetë jashtë vendit.
Një nga personat e përfshirë në këtë aktivitet kriminal, rezulton me profil tejet të thjeshtë, mësues historie në Shqipëri. Kjo është hera e parë që një grup kriminal shqiptar ka në fokus trafikimin e drogërave sintetike.
