Arrihet më në fund marrëveshja e armëpushimit mes Hamasit dhe Izraelit.
Pas më shumë se një viti luftimesh, më në fund ka ardhur një lajm i mirë për banorët që përballën me makabritetet e luftës. Marrëveshja përfshin ndalimin e luftimeve dhe lirimin e një numri pengjesh dhe të burgosurish palestinezë.
Sipas “Sky News”, kjo marrëveshje do të ishte një përparim i madh në një luftë që ka lënë dhjetëra mijëra njerëz të vdekur dhe shumë të tjerë të plagosur dhe të zhvendosur nga shtëpitë e tyre.
Marrëveshja përshkruan një fazë fillestare gjashtë-javore të armëpushimit që përfshin një tërheqje graduale të forcave izraelite nga Gaza qendrore dhe kthimin e palestinezëve në Gazën veriore, njoftoi agjencia e lajmeve “Reuters”, duke cituar një zyrtar të informuar për marrëveshjen.
Hamasi do të lirojë 33 pengje, duke përfshirë të gjitha gratë, fëmijët dhe burra mbi moshën 50 vjeç, tha agjencia. Në këmbim, Izraeli do të lirojë qindra të burgosur palestinezë.
Pati raportime të palestinezëve që festonin në Gaza ndërsa lajmet për marrëveshjen e mundshme të armëpushimit u përhapën.
Donald Trump, i cili do të jetë sërish president i SHBA-së pas disa ditësh, tha: “Ne kemi një marrëveshje për pengjet në Lindjen e Mesme. Ata do të lirohen së shpejti”.
Zbatimi i marrëveshjes do të garantohet nga Katari, Egjipti dhe SHBA.
Qeveria e Izraelit do të votojë për marrëveshjen e Gazës të enjten, tha një zyrtar.
Kryeministri izraelit Benjamin Netanyahu tha më parë se ai ishte i vendosur të shkatërronte Hamasin pasi grupi militant palestinez vrau 1200 njerëz dhe kapi rreth 250 pengje kur ata hynë në Izrael nga Gaza më 7 tetor 2023.
Më shumë se 45,000 palestinezë janë vrarë në ofensivën e mëvonshme izraelite në Gaza, thotë ministria e shëndetësisë e Hamasit.
