Raundi i tretë i negociatave midis partnerëve të koalicionit të mundshëm të kancelares, Angela Merkel do të përqëndrohet në politikat e emigracionit dhe azilit dhe pritet të jetë jashtëzakonisht i vështirë, tha sot një nga anëtaret kryesore të të Gjelbërve.
”Kristiandemokratët e Merkelit (CDU), aleatët e tyre bavarez , Unioni Kristiansocial (CSU), Demokratët e Lirë (FDP) dhe të Gjelbërit do të angazhohen në negociata jashtëzakonisht të vështira lidhur me një nga çështjet më të diskutueshme”, tha Claudia Roth .
Një ndër kushtet e CSU-së ultrakonservatore për të qënë pjesë e koalicionit ishte kufizimi i numrit të emigrantëve që hyjnë në Gjermani çdo vit, në një limit vjetor deri në 200 000.
Bavaria ka pritur prurjet më të mëdha të refugjatëve nëpërmjet kufirit të saj jugor me Austrinë.
Të dyja partitë e vogla janë shprehur kundër çdo kufizimi të tillë, duke argumentuar se ajo bie ndesh me rregullat kushtetuese mbi të drejtën e azilit.
Konservatorët e Merkelit duan të vazhdojnë masën e pezullimit të së drejtës për bashkim familjar për azilkërkuesit të cilët kanë vetëm mbrojtje plotësuese pas muajit mars 2018.
Lideri i FDP-së, Christian Lindner tha sot për gazetën e përjavshme gjermane “Der Spiegel” se çështja e bashkimit familjar do të nxiste në mënyrë absolute një konflikt me të Gjelbërit, të cilët e kanë kundërshtuar fuqishëm pezullimin e tyre.
Gjithashtu, bisedimet e sotme do të përqëndrohen në politikën e klimës dhe të energjisë./b.d
