Marrëveshja e refugjatëve e Bashkimit Evropian me Turqinë do të shërbejë si model për marrëveshje të ngjashme me vendet e Afrikës Veriore, tha kancelarja gjermane, Angela Merkel në një intervistë të botuar sot nga gazeta “Passauer Neue Presse”.
Në një përpjekje për t’i dhënë fund migracionit të paligjshëm në Evropë, liderët e BE-së ranë dakord në muajin mars për të marrë një refugjat sirian nga Turqia për çdo sirian të paligjshëm të kthyer.
Mbi 1 000 refugjatë sirianë janë zhvendosur në Evropë që kur u arrit marrëveshjat, dhe Greqia, një pikë kryesore e hyrjes për migrantët, ka shënuar një rënie të konsiderueshme në ardhje.
“Ne do të na duhet të arrijmë marrëveshje të ngjashme me vendet e tjera, për shembull në Afrikën e Veriut, në mënyrë që të arrihet një kontroll më i mirë mbi rrugët e refugjatëve në Mesdheun qendrore”, tha Merkel për “Passauer Neue Presse”.
Sipas marrëveshjes së refugjatëve, BE-ja ka rënë dakord gjithashtu për të rritur ndihmën financiare për refugjatët, të cilët jetojnë në Turqi, do të heqë vizat për qytetarët turq dhe do të përshpejtojë bisedimet e anëtarësimit të Ankarasë në BE.
