Emrat e deputetëve që ndryshuan parti, nga Mesila Doda deri tek Kastriot Islami
Me largimin e deputetes Mesila Doda nga Partia Demokratike shtohet akoma më shumë numri i politikanëve që kanë ndryshuar parti. Edhe pse Mesila Doda nuk ka deklaruar se në cilin grupin parlemtar do të përfshihet, mendohet se ajo do të kalojë në grupin parlamentar të PDIU-së. Aq më tepër që me kreun e kësaj partie, Shpëtim Idrizin, ka pasur disa bashkëpunime sicc ishte rasti i projektligjit për hapjen e dosjeve të komunizmit.
Deputetët që ndryshuan parti
Ndërkohë nëse kanë pasur një specifikë politika e dhjetëvjeccarit të fundit ka qenë padyshim lëvizjet e politikanëve dhe partiakëve nga një parti tek tjetra. Deputetët që e marrin mandatin nën siglën e një force dhe e mbyllin me një forcë tjetër. Kryetarë bashkie që garojnë me logon e një partie dhe anëtarësohen në një parti tjetër. Javanews po sjell sot një përmbledhje të disa prej lëvizjeve më të bujshme të këtyre dhjetë viteve të fundit.
Merkatoja
Shpesh ishim mësuar që termin merkato ta dëgjonim për futbollistët, por në vendin tonë kjo fjalë u shkon përshtat fare mirë politikanëve. Para dy vitesh, tre deputetë socialistë kaluan në llogoret e Partisë Demokratike. Asllan Dogjani, Gjovalin Kadeli dhe Kastriot Islamin, kaluan në radhët e demokratëve. Tre deputetët kaluan tek kundërshtari i tyre pas debateve me Edi Ramën. Ndërkohë pas kandidimit në qarkun Lezhë me Partinë Demokratike në 23 qershor të 2013, Kadeli bëri një tjetër lëvizje, duke kaluar tek Lëvizja Socialiste për Integrim.
Por transfertat nga një parti tek tjetra janë bërë aq e rëndomtë sa çdo ditë e më shumë një fenomen i tillë nuk përbënë më lajm. Që në 2005 kemi disa deputetë që kishin fituar me një parti mandatin dhe e kishin braktisur atë. Kulmin e ka Lufter Xhuveli, i cili mori vota në koalicionin e majtë dhe shkoi ministër në qeverinë e djathtë. Po ashtu deputetët Hamit Kosta, Nikollaq Neranxi, Tom Doshi, Paulin Sterkaj, Luan Memushi, Spartak Ngjela, Gilman Bakalli, Piro Lutaj, Nard Ndoka, Preç Zogaj, Gjovalin Kadeli, Dritan Prifti etj., janë disa nga emrat e shumtë të deputetëve që kanë ndryshuar parti të paktën një herë.
Lëvizjet më të mëdha midis partive kanë ndodhur në kampin e majtë, nga LSI në drejt Partisë Socialiste ose anasjelltas. Jo pak herë edicionet e lajmeve ose titujt kryesor të gazetave janë hapur me largime nga një parti tek tjetra. Kjo lloj marrëdhënieje midis dy forcave ka nisur që më 2005. Herë-herë këto lëvizje janë dukur si groteske dhe jo rrallë herë si lëvizje të dyshimta. Themi të dyshimta, pasi ato të lënë përshtypjen e veprimeve të njerëzve të cilët kanë humbur privilegjet në partinë ku ishin dhe rendin në kërkim të një kontrate të re me partinë tjetër, që do të thotë në kërkim të një karrigeje tjetër. Në këtë lëvizje pa dyshim që Partia Socialiste ka arritur të marrë më tepër nga LSI, por dhe kjo e fundit nuk ka qëndruar duarkryq. Shumë nga figurat historike të kësaj partie janë tashmë pjesë e LSI-së. Kujtojmë emra si Luan Rama, Lefter Koka, që kanë qenë pjesë e rëndësishme e PS-së dhe tashmë përfaqësojnë flamurin e LSI-së. Lëvizje të tjera brenda së majtës ka pasur dhe me partitë e tjera.
Edhe pse jo me bujën e së majtës, dhe në kampin e djathtë kemi pasur merkato politike. Emri më i rëndësishëm që ka bërë lëvizje është ai ish-kryeministrit, Aleksandër Meksi, që braktisi forcën që e mandatoi për pesë vjet kreun e qeverisë shqiptare, për të shkuar në koalicionin tjetër të djathtë, Poli i Lirisë. Po ashtu dhe deputeti i Shkodrës. Në zgjedhjet e 28 qershorit të 2009-ës për PD-në konkurruan dy emra të njohur të Partisë Bashkimi për të Drejtat e Njeriut, Spiro Ksera dhe Kosta Barka, të cilët për shkak të pakënaqësisë së koalicionit të Dules me PS-në vendosën ta braktisin partinë e tyre për PD-në, ata edhe në këto zgjedhje kandidojnë sërish për PD.
Por skizma më e madhe e PD-së erdhi kur lindi Fryma e Re Demokratike. Shumë eksponentë të njohur të PD kaluan tek partia e re, ku mund të përmendim ish-presidentin Topi (kryetar i kësaj partie) dhe deputetin Gazmend Oketa.
Disa nga lëvizje tek e Djathta
Nard Ndoka Nga PD tek PDK
Tom Doshi Nga PDK tek PS
Lajla Përnaska Nga PR tek PD
Preç Zogaj Nga PD-PLD-PD-PS-PD
Gilman Bakalli Nga PD tek Poli i Lirisë
Kosta Barka Nga PBDNJ tek PD
Spiro Ksera Nga PBDNJ tek PD
Aleksandër Meksi Nga PD tek Poli i Lirisë
Bamir Topi nga PD tek FRD
Gazmend Oketa nga PD tek FRD
Mesila Doda, u largua sot nga PD
Disa nga lëvizjet tek e Majta
Hamit Kosta nga PDS tek PS
Paulin Sterkaj nga PS tek PD, sërish tek PS
Luan Memushi nga PS tek LSI
Luan Rama nga PS tek LSI
Piro Lutaj nga PAD tek PS
Shpëtim Idrizi nga PS tek PDIU
Vangjel Tavo nga PS tek LSI
Dritan Prifti nga LSI tek PS, tani i pavarur
Asllan Dogjani nga PS tek PD
Gjovalin Kadeli nga PS tek PD, nga PD tek LSI
Kastriot Islami nga PS tek PD
