“Mendoni se 35 deputetë s’e panë emrin tim?!”/ Endrit Shabani: S’e trazova unë politikën, mora firmat e PD e votat e PS!

Endrit Shabani, i cili u zgjodh Avokat Populli mes tensioneve, tha se nuk ishte ai që e trazoi politikën. Sipas Shabanit, situata e tij u përdor për të bërë zhurmë. 

Në një intervistë për News 24, ai theksoi se garoi me firmat e deputetëve demokratë, ndërsa u zgjodh me votat e marra nga socialistët dhe parti të vogla. 

Shabani tha se garoi me firmat e demokratëve dhe opozitarëve të tjerë, ndërsa u zgjodh me votat e socialistëve. 

“Nuk e kam trazuar unë politikën, ata kanë qenë të trazuar dhe në një situatë konkurrence përdoret një person apo një rast. Dhe nuk besoj se jam aq i rëndësishëm apo roli i Avokatit të Popullit sa të ndodhte kjo zhurmë. Gjithsesi kaloi dhe çështja është të fokusohemi të puna. Unë kam garuar me firmat e PD dhe aktorët e tjerë opozitarë, dhe jam votuar nga partitë që ishin në sallë, PS dhe disa partitë e tjera të vogla dhe dy tre parti të reja në sallë votimi ishte i fshehtë dhe se di se kush ka votuar pro apo kundër por qartaz PS në bllok ka votuar pro meje. Unë jam propozuar nga PD dhe partitë e tjera opozitare, 35 më kanë mbështetur dhe jam votuar nga PS dhe partitë e tjera të vogla. Kandidaturë më konsensuale zor se do të gjejnë.”, theksoi Shabani.  

I pyetur për faktin se deputetët demokratë tërhoqën firmat, ai shtroi pyetjen se “mendoni se të gjithë nuk e kanë parë emrin e tij?” Sipas tij, të gjithë kanë firmosur me vetëdije. 

“Nuk kanë kërkuar ndjesë të gjithë. Mendoni ju vërtet se 35 deputetë të opozitës nuk kanë parë se për kë po firmosin. Mund të kenë ndodhur dinamika të brendshme që unë s’i di. Ata kanë pasur një kandidat të tyre, Adriana Kalanë, ajo është aktiviste e PD dhe mund të kenë pasur atë si preferencë. 

Ata kanë firmosur më shumë se një kandidat. Mesa kam parë kanë firmosur për shumë kandidatë. Unë i jam drejtuar të gjithëve, edhe PS, dhe më thanë që nuk firmosim dot për askënd. Më thanë që kemi vendosur që t’ia lëmë opozitës. Më pas ne do të zgjedhim. E vetmja mënyrë që ne të garonim ishte të kalonim përmes filtrit të PD. Jam mirënjohës se pa firmat e tyre nuk do të garoja dot. Askush nuk kanë firmosur pa e ditur. Ndihem keq edhe për presionin që janë detyruar të mbajnë për një gjë që s’kanë bërë gabim. Në letër që në krye te herëspërmendet emri im.”, shtoi ai. 

Kujtojmë që ai u betua si Avokat i ri i Popullit mes tensioneve gjatë seancës së kaluar në Kuvend, ndërsa i përshëndeti me dorë dhe me puthje deputetët e opozitës përpara se të ikte nga Kuvendi.