Kryeministrja e Italisë, Giorgia Meloni, ka përdorur fjalimin e saj të parë para deputetëve për të theksuar synimin e saj për të ndaluar anijet me emigrantë që kalojnë Mesdheun.
“Ne duhet të ndalojmë udhëtimet e paligjshme dhe trafikimin e qenieve njerëzore,” tha ajo, duke përsëritur një premtim të fushatës për të ndaluar anijet që shkojnë në Itali nga Afrika e Veriut.
Për vite me radhë Italia ka qenë një qendër për emigrantët e parregullt që shkojnë drejt Evropës.
Më shumë se 77,000 kanë ndërmarrë udhëtime shumë të rrezikshme drejt Italisë këtë vit, duke ushtruar presion mbi komunitetet lokale. Meloni, 45 vjeçe, drejton partinë Vëllezërit e Italisë dhe ka ardhur në pushtet në krye të një koalicioni të krahut të djathtë.
“Ne nuk synojmë në asnjë mënyrë të vëmë në dyshim të drejtën e azilit për ata që ikin nga luftërat dhe persekutimet,” i tha ajo dhomës së ulët të parlamentit. “Gjithçka që duam të bëjmë në lidhje me emigracionin është të ndalojmë trafikantët e njerëzve që të kenë zgjedhjen për të vendosur se kush hyn në Itali.”
Ajo tha se ndjente peshën e të qenit liderja e parë femër e vendit të saj dhe përdori fjalën angleze “underdog” për të përshkruar veten, duke i nderuar një gamë të gjerë grash italiane që kishin shkuar para saj për të “thyer këtë tavan të fundit prej xhami”.
Ajo u prit me ovacione dhe thirrje “Giorgia, Giorgia”. Qeveria Meloni u betua vetëm të shtunën dhe tashmë ajo i është rikthyer një teme të ndjekur nga një prej partive të saj, Lidhja e ekstremit të djathtë, në 2018-19.
Pak para se të fliste kryeministri, ministri i ri i Brendshëm, Matteo Piantedosi, kërcënoi se do të mbyllte portet për dy varkat e shpëtimit që transportonin qindra emigrantë, me argumentin se Ocean Viking dhe Humanity1 nuk po zbatonin rregullat.
/e.d
