Nga Armando Meta/
Letra që kryetari i grupit parlamentar të PD-së, Edomod Spaho, drejtuar ambasadorëve më të rëndësishëm në Tiranë, atij amerikan Donald Lu, asaj të BE-së Romana Vlahutin, si dhe shefes së ONM Calavera, ngre me të drejtë një seri shqetësimesh që lidhen me zbatimin e Reformës në Drejtësi. Rrudhja e buxhetit nga ana e qeverisë ndaj organeve të vetting-ut, përbën një nga sinjalet e para serioze negative të mazhorancës aktuale, ndaj zbatimit të Reformës në Drejtësi.
Kjo reformë, prej mëse 2 vitesh, ka qenë ‘kali i betejës’ elektorale të kryeministrit Rama, si në procesin e brendshëm politik në raport me PD dhe LSI, ashtu edhe në fushatat elektorale, duke u shprehur vazhdimisht se qeveria nuk do të kursejë fonde në mbështetje të pastrimit të sistemit të kalbur të drejtësisë. Por dinamika e zhvillimeve më të fundit në Kuvend provoi se “nga e thëna tek e bëra” vijon të jetë një hendek i madh, gjë që ka ngritur pikëpyetje mbi vullnetin e mazhorancës për të mbështetur Reformën në Drejtësi në përgjithësi dhe procesin e vetting-ut në veçanti.
Pavarësisht motiveve që ka PD dhe LSI për të sulmuar mazhorancën në lidhje me vetting-un, kritikat e tyre kanë një bazë reale. Përpjekja për të angazhuar njerëzit më të pastër dhe më profesional më betejën për të reformuar drejtësinë shqiptare është pozitive moralisht dhe ligjërisht. Por nga ana tjetër që këta njerëz të bëjnë punën e tyre si dhe sa duhet kërkohet që të mbështeten fuqishëm edhe financiarisht, duke forcuar llogaridhënien e tyre për çdo qindrakë të shpenzuar nga paratë e taksapaguesve. Jemi të vetëdijshëm se shteti shqiptar është i varfër në aspektin e trajtimit financiar të shtetarëve të saj serioz që marrin mbi supe të luftojnë korrupsionin dhe krimin e organizuar. Por nga ana tjetër jemi të vetëdijshëm se qeveria nëpërmjet racionalizimit të shpenzimeve të saj buxhetore e ka plotësisht të mundshme që të mundësojë fonde shumë më të mëdha për një trajtim dinjitoz financiar të këtyre njerëzve. Drejtësia kushton, por mungesa e drejtësisë provoi se është akoma më e kushtetueshme. Një kosto që ka drobitur deri dhe financat e shtetit. Për sigurimin e fondeve të mjaftueshme mund të lobohet edhe pranë institucioneve ndërkombëtare, të cilat do të ishin të gatsghme të mbështesin seriozisht nëse shohin vërtetë një vullnet maksimal për të nxjerrë drejtësinë nga kthetrat e krimit dhe korrupsionit. Shkurtimi me një të rënë të lapsit të financimit të organeve të vettingut në masën deri 40%, është një mesazh negativ i qeverisë, pavarësisht se në kërkesat e bëra nga trupa që do të merret me vetting-un ka edhe egzagjerime. është vështirë të kuptohet sesi mund të motivohen njerëzit për t’u përballur me bosë të krimit dhe korrupsioinit që kanë miliona euro me paga qesharake.
Por nnga tjetër letra e Spahos, të sjell në mend edhe një pjesë të errët të rolit të PD-së në përpjekjet e saj deri dhe titanike, për të sabotuar Reformën në Drejtësi dhe vetting-un në veçanti. është pikërisht roli i PD-së në këtë proces që ndikoi në dobësimin e disa segmeneteve të vetting-ut. Nga ana tjetër zelli i PD për të mbajtur të paprekur kastën e saj të gjyqtarëve të korruptuar deri në palcë, thjeshtë për interesa politike, ka bërë që vetting-u të sorollatet ende në sallën e Gjykatës Kushtetuese, si pasojë e ankimimeve të saj dhe të shoqatave të gjyqtarëve të lidhura me PD, të cilat kërkojnë medoemos që të mos hetohen për pasuritë e paligjshme që gjyqtarët kanë vënë si pasojë e biznesit kriminal me drejtësinë. Pretendimet që shfaqen në letrën e Spahos, për hirë të realitetit, janë mëkate shumë më të vogla nga ana e qeverisë, sesa përpjekjet e PD për të bllokuar vetting-un dhe sabotimin e saj në çdo hap të procesit. Përpara se të shohësh qimen në surin e tjetrit, në rradhë të parë duhet parë trau që të ka zënë ty syrin. Nuk presim që PD të kërkoj falje për mëkatet e saj kundër vetting-ut, por nga ana tjetër duhet të jetë modeste për t’u deklamuar se tashmë është “dashuruar” pas vetting-ut. Drejtësia e kalbur dhe e kriminalizuar mban edhe vulën e saj të turpit.
