Një megaoperacion i gjerë antikriminal në bashkëpunim edhe me autoritetet italiane po zhvillohet në disa qytete të Shqipërisë, nën drejtimin e Prokurorisë së Posaçme kundër Korrupsionit dhe Krimit të Organizuar.
Burime bëjnë me dije se operacioni ka nisur në orët e para të mëngjesit dhe po shtrihet në qytetet Tiranë, Durrës, Fier dhe Vlorë, me pjesëmarrjen e forcave të shumta të rendit dhe të njësive speciale.
Operacioni lidhet me goditjen e grupeve të strukturuara kriminale, që dyshohet se janë përfshirë në trafik të lëndëve narkotike dhe veprimtari të tjera të krimit të organizuar. Deri më tani, janë lëshuar disa urdhër-arreste dhe po kryhen kontrolle në banesa.
Raportohet se në total brenda e jashtë vendit janë lëshuar 52 urdhër arreste. Mësohet se të paktën 20 prej tyre janë për të ekzekutuar në vendin tonë. Mes personave që janë lëshuar urdhër arreste ka zyrtarë, policë e biznesmenë. Ndërsa janë sekuestruar edhe një sërë pasurish të paluajtshme në Tiranë e Durrës.
