Nuk është e para herë që mediat në Shqipëri të bëjnë gafa duke e hedhur lajmin pa e verifikuar më parë. Por këtë radhë kjo gafë ka përfshirë mediat më të rëndësishme dhe më në zë në vend, të cilat që në faqen e parë të tyre arrestuan ish-kryeministrin e Çekisë Petr Necas për afera korruptive në CEZ.
Në fakt këto ditë është vënë në pranga ish-administratori i borxheve në CEZ Kastriot Ismailaj, i cili nga hetimet e Prokurorisë, rezultoi se kishte pastruar paratë në shumën e 5 milionë eurove.
Dhe pikërisht në mungesë të një fotografie në internet, apo qoftë edhe prej shpejtësisë për të publikuar lajmin, thuajse të gjitha mediat nxorrën në faqen e parë të tyre foton e ish-kryeministrit çek Petr Necas.
Si për ironi të fatit, mediat zgjodhën një çek për kompaninë çeke CEZ. Nga ana tjetër, ambasada e Çekisë në vendin tonë, duhet të ketë qenë shumë e mërzitur me këtë fakt, që një nga figurat e politikës së këtij vendi të përfundojë në faqet e para të shtypit gabimisht si autor i vjedhjes së 5 milionë eurove në Shqipëri.
