Kritikat e ashpra të bëra ditën e djeshme nga gazeta greke “Kathimerini” ndaj kryeministrit të Shqipërisë Edi Rama lidhur me deklaratën e tij për një bashkim kombëtar të Shqipërisë me Kosovën, duket se nuk vijnë si rrufe në qiell të hapur.
Kjo pasi pasqyrimi në mediat e vendit fqinj për kryeministrin shqiptar, kohët e fundit kanë qenë kritikuese, veçanërisht sa i përket çështjeve të Ballkanit, dhe ngjarje ku janë të përfshirë shqiptarët.
E teksa dje “Kathimerini” e cilësonte si injorant në histori Ramën, po kjo gazetë ditën e sotme ka vazhduar kritikat ndaj qeverisë shqiptare për “ftohjen” e marrëdhënieve Tiranë-Moskë.
Siç shkruan gazeta helene, kryeministri Rama po mban një politikë anti-ruse me qëllim për t’i bërë përshtypje partnerëve evropianë dhe se me këtë mënyrë pretendon të afrojë edhe më tepër periudhën e anëtarësimit të vendit tonë.
Sipas gazetës katalizator i këtij konflikti është bërë sulmi i armatosur në Gashnicë të Maqedonisë nga UÇK-ja ku shqiptarët morën peng një stacion policor.
“Kathmierini” sjell në vëmendje edhe refuzimin që Shqipëria i bëri ftesës ruse për të marrë pjesë në paradën ushtarake të 9 Majit në Moskë.
Megjithatë gazeta helene nuk është e vetmja që është ndalur më gjërësisht në deklaratat e bëra nga kryeministri shqiptar për bashkim kombëtar. Edhe media të tjera greke i kanë kushtuar një hapësirë të konsiderueshme këtyre deklaratave, veçanërisht kritikave që kanë ardhur si nga pala serbe ashtu edhe nga faktori ndërkombëtar.
Neësbomb.gr ka nxituar të publikojë reagimin e Ministrit të Jashtëm serb Ivica Daçiç për deklaratat e Ramës duke u shprehur se pretendimi për bashkimin Kosovë-Shqipëri është i papranueshëm për Serbinë.
Ndërsa këto deklarata të Ramës, Neësbomb.gr i ka cilësuar si kërcënime të reja të shqiptarëve ndaj Serbisë.
E njëjta gjë është publikuar edhe në gazetat e tjera “Tanea” dhe “Iefimerida”
Megjithatë për të parë natyrën kritike të mediave greke ndaj kryeministrit shqiptar duhet të kthehemi pas në takimin histori mes Ramës dhe Vuçiç në Beograd.
Sipas asaj që shkruan Neësbomb.gr kryeministri Rama e preu në besë homologun Vuçiç duke folur për Kosovën në konferencën e përbashkët për shtyp edhe pse kishin rënë dakord që këtë temë do ta shmangnin.
Ndërsa gazeta “Iefimerida” duke cituar kryeministrin serb, shprehet se Rama abuzoi me mikpritjen që iu bë në Beograd.
Siç duket notat kritikuese të mediave helene ndaj kryeministrit shqiptar nuk janë të fundit apo të rastësishme.
Redaksia Online
(JavaNews.al)
