Kryeministri Edi Rama u ndal sot, 16 dhjetor, te mjedisi i krijuar me median online.
Në tryezën e Konferencës së 8-të Kombëtare për të Drejtën e Informimit, ai kujtoi iniciativën e dikurshme të qeverisë për një ligj për median, që nuk u realizua dot, pasi u shtrua mundësia për vetërregullim. Instrument ky i fundit që u kërkua edhe nga OSBE/ODHIR-i.
Rama theksoi se në fakt ka ndodhur krejt e kundërta, një degjenerim që sipas tij vetëm sa thellohet.
“Ishte një draft ku kërkoheshin ca gjëra shumë elementare, që nga deklarimi i personave që janë mbrapa një portali, adresa dhe mundësia për çdokënd që ta dijë se kush po i lexon librin e shpisë, edhe disa gjëra të tjera shumë elementare. U tha se vetërregullimi do të jetë instrumenti që do sjellë një nivel tjetër në botën online, siç e keni parë ka pasur degjenerim të vazhdueshëm gjithmonë e më të madh.
Megjithatë ne hoqëm dorë atëherë dhe nuk kemi ndërmend të rivëmë dorë, vetëm mbase BE t’i ketë thirrur mendjes dhe ta shohin se gjëja po del jashtë kontrollit, media online në tërësi është bërë një territor ku ndërhyjnë edhe forcat jo miqësore në BE, ndërhyhet në zgjedhje, këtu, atje..
Normal nëse shtëpinë e lë pa dritare, pa çati dhe pretendon të flesh rehat dhe askush të mos hyjë në shtëpi, atëherë beson në një botë që nuk ekziston”, tha numri një i kabinetit.
Më tej, nënvizoi se ndryshe nga 24 vende të Bashkimit Europian, Shqipëria nuk e dënon penalisht një gazetar nëse ky i fundit shpif. Aspekti penal, tha kryeministri, ekziston vetëm për të zgjedhurit nga populli.
“Do të heqim aspektin penal për të gjithë ata që jetojnë dhe punojnë me informacionin”, bëri me dije Rama.
“E di që nuk do të na vihet tek meritat në raport me lirinë, asnjëherë nuk do e numëroni si gjest pozitiv, megjithatë kjo nuk është detyra juaj. Me gotën gjysmë plot ju uroj gëzuar Vitin e Ri të gjithëve ju në sallë! Dekriminalizimi i shpifjes për gazetarët, jo për politikanët dhe të zgjedhurit. Kush zgjidhet nga populli dënohet nëse shpif”, përfundoi ai.
