Shqipëria dhe Greqia duket se kanë finalizuar marrëveshjen për paketën e çështjeve të mbetura pezull mes vendeve, mes të cilave është edhe ajo e “Detit”.
Mediat greke e bëjnë thuajse të sigurt arritjen e akordit, edhe pse nuk ka pasur asnjë deklaratë zyrtare nga dy qeveritë.
Sipas asaj që raporton “news247.gr”, ministrat Nikos Kotzias dhe Ditmir Bushati kanë mbyllur bisedimet dhe është rënë dakord për çështjet e mbetura pezull.
“Në qoftë se nuk ka mosmarrëveshje të minutës së fundit për marrëveshjen e përfunduar, dy kryeministrat Aleksis Cipras dhe Edi Rama do të mbajnë një takim ku do të nënshkruajnë dokumentin. Kjo mund të ndodhë gjatë Samitit të BE-së më datat 28 dhe 29 Qershor”, raporton media greke.
Më tej theksohet edhe roli që sipas mediave greke ka luajtur Presidenti shqiptar Ilir Meta për të vonuar arritjen e akordit. “Marrëveshja do ishte finalizuar prej kohësh nëse nuk do ndërhynte presidenti”, thuhet më tej në shkrim.
Sipas medias greke, marrëveshja finale përjashton çështjen çame, por i jep zgjidhje heqjes së Ligjit të Luftës, pronave si dhe kufirit detar./a.m.
