Akuzave të opozitës për emërimet nepotike në drejtorinë e Burgjeve, socialistët iu përgjigjën me një email të sajuar të Sekretarit të Përgjithshëm të PD-së, Arben Ristani. Emailin e lexoi deputeti Taulant Balla, i cili sqaroi më pas se një email i tillë është i vërtetë aq sa janë të vërteta pretendimet e opozitës.
“I dashur Doktor,
Protestat tona nuk arrijnë të mbledhin njerëz pasi Luli nuk frymëzon askënd. Prandaj në emër të gjithë të vjetërve në Partinë Demokratike të lutem të marrësh situatën në kontroll.
Është tejet e rëndësishme që në protestën e radhës të mbani edhe Ju një fjalë, që të paktën njerëzit e pranishëm në protestë, por edhe ne deputetët dhe drejtuesit e PD, të marrim pak kurajë dhe guxim. Juaji përjetësisht,
Arben Ristani”
Ky ishte emaili i pretenduar, për të cilin Balla tha se të gjithë në SHKUP në fakt mendojnë kështu.
“Arsyeja përse e nxorëm këtë letër të sajuar është për t’i treguar publikut se sa e thjeshtë është të shkruash një trillim në kompjuter e ta printosh në një fletë të bardhë. Por a është normale kjo?”-pyeti ai.
Sqarimi erdhi pas një letre që demokratët publikuan dje, sipas të cilëve zv/drejtori i Burgjeve i ka shkruar kryeministrit Rama.
“Ajo letër nuk ekziston”-tha Balla, duke shtuar se në “SHQUP është krijuar një departament i veçantë i fabrikimit të dokumenteve, letrave dhe emaileve”.
Dita
