Kryeministri Edi Rama ka nisur nga kjo e diele komunikimet javore me qytetarët në rrjetin social “facebook”.
Komunikimin e parë pas nisjes së sezonit politik, Rama ia ka dedikuar kryetarit të ri të Kuvendit, Gramoz Ruçit dhe prezantimit të qeverisë së re nesër në Kuvend, pas marrjes së dekretit nga Presidenti Meta.
Rama shprehu gjithashtu bindjen se Gramoz Ruçi në krye të Kuvendit do të garantojë një bashkejetësë të shëndetëshme mes shumicës dhe pakicës në sallë.
Duke iu përgjigjur akuzave të opozitës, Rama shton gjithashtu se Kuvendi nuk do jetë më klubi i ligjëratave pa rend dite dhe as vend për hesapet personale të kundërshtarëve politikë.
Sipas tij, “koha do ta tregojë shpejt ndryshimin e cilësisë në drejtimin e Kuvendit që s’do jetë klubi i ligjëratave pa rend dite, me një lumë fjalësh sipas hesapeve partiake”.
“Dje kemi zgjedhur kryetarin e ri të Kuvendit, deputetin me përvojën më të gjatë parlament, i cili do të jetë garanti i palëkundur i bashkëjetesë mes opozitës dhe mazhorancës në Kuvend.
Natyrisht keqardhje me sulmin e baltës ndaj kryetarit të ri Kuvendit, që janë jehonë e zbrastësisë së ideve që ka karakterizuar opozitën për vitet të tëra.
Koha do ta tregojë shumë shpejt ndryshimin e cilësisë së drejtimit të Kuvendit, ku nuk do të jetë më klubi i ligjëratave të parend dite dhe pakufi, etik dhe kohor me një lumë fjalësh sipas hesapeve partiake te ligjvënëseve.”, tha Rama.
Ndryshe nga rubrikat që publikonte çdo të dielë deri para zgjedhjeve të 25 qershorit, rubrika e parë ishte një prezantim përmbledhës i programit të qeverisë “Rama 2”.
“Do të kemi një qeveri të re në koalicion me njerëzit e zakonshëm. Nesër në 10 paradite do të marr fjalën në Kuvend për programin e qeverisë dhe menjëherë pas besimit, qeveria do të nisë menjëherë nga puna me mbledhjen e parë, që do të shpallë vitin Mbarëkombëtar të Skënderbeut dhe vendosë lehtësimet e para nga barra e burokracisë për shpatullat e njerëzve të zakonshëm”, thotë ai.
Rama risolli në kujtesë shembullin e certifikatave, ku Shqipëria prodhon 4.5 mln të tilla në vit.
“Më shumë certifikata të prodhuara në vit sesa vetë popullsia jonë brenda dhe jashtë vendit. 4.5 mln radha në vit vetëm për të vërtetuar që ti ekziston. Me certifikatën do të nisë eleminimi i dhjetra-mln udhëtimeve, radhëve dhe kontakteve me sportelet e zyrave të shtetit”, deklaroi ai.
Rama thotë se Qeveria e re është krijuar për të qenë një qeveri e qytetarëve në kuptimin më konkret të fjalës, ndërsa ndryshimi i strukturës së ekzekutivit, premton se do të shtrihet në gjithë mekanizmin e administratës.
“Është fillimi i një procesi ndryshimi kapilar që do të shtrihet në gjithë mekanizmin e shtetit dhe do të lehtësojë jetën e çdo qytetari në marrëdhëniet me administratën, do të ulë korrupsionin dhe do të rrisë transparencën, do të fuqizojë ekonominë, rrisë sigurinë dhe përshpejtojnë ecurinë europiane të vendit”, deklaroi ai.
a.ç
