UEFA ka dënuar Lokomotivën e Moskës për shkak të koreve raciste ndaj Skënderbeut.
Më në fund UEFA ka vendosur që t’i dënoj koret raciste që u bënë në drejtim të lojtarëve të Skënderbeut, në përballjen e 1 Tetorit me Lokomotivën në Moskë, e vlefshme për fazën e grupeve të Ligës së Evropës. Komisioni i Disiplinës, në mbledhjen e fundit, vendosi të boshatisë atë sektor të stadiumit ku u dëgjuan thirrjet; ‘Vrite shqiptarin dhe Kosova është Serbi’.
Në sfidën e radhës, në shtëpi të Lokomotivës së Moskës, në ndeshjen ndaj Beshiktashit më 22 Tetor, në vend të tifozëve, do të ketë një parullë; Jo racizmit.
Po ashtu UEFA ka gjobitur me 20 mijë euro klubin moskovit, që një ditë pas ngjarjeve kërkoi ndjesë, duke shtuar se nuk do të lejojë më ngjarje të tilla.
