Nga Ben Andoni/
Shërbimet inteligjente të trembin me emrin e madh, por në realitetin shqiptar në vitet e fundit ato janë thjesht inekzistente. Jo thjesht, se nuk kanë lajmëruar për fenomene dhe nuk kanë parandaluar të këqija të mëdha në vend, por se nuk duket se kanë shpresë të reformohen edhe për shumë kohë të tjera. Pyetja e parë që të lind, kur shikon monstruozitetet e këtyre të Lazaratit me statuset e ISIS-it në krye, apo të tjerë që kërcënojnë publikisht, e shpërthimet ngado, është a kemi vallë Shërbime inteligjente? ! Nëse i shoshit të gjitha rastet e të keqes në vend, bindesh se Shqipërisë i mungon një sistem i duhur mbrojtje dhe parandalimi, ku një nga detyrat kryesore duhej ta bënte shërbimi informativ kombëtar.
Ky i fundit jo vetëm nuk e ka bërë detyrën e vet, por prej vitesh fle në një gjumë letargjik.
Për hir të së vërtetës ka ardhur koha për një konceptim të ri të shërbimeve të shumta që janë sajuar në vend, shumica e të cilëve duken thjesht për qëllime konjukturale. Të mos harrojmë paradoksin e viteve më parë, kur Kryeministri i atëhershëm ngaqë nuk e shkarkonte dot Drejtorin e SHIKut, mbështeste Shërbimin e Ushtrisë si më të besueshëm!!!
Dhe, s’mbaronte këtu: Shqetësimi më i madh është ngritja e shumë strukturave të inteligjencës që morën hov në kohën e Berishës dhe më shumë se punën, mbanin ose afruan njerëz që vegjetonin dhe më keq akoma përgjonin ata që s’duhej duke u kthyer thjesht në zgjatime të kryeministrit.
Shqipëria është një vend jo thjesht i vogël, por edhe një i tillë që duhet t’i masë mirë resurset e saj, sepse armiqtë i ka shumë më të mëdhenj sesa fuqitë e saj. Të mendosh armët që kishin djemtë e bandës së fundmi, apo mënyrat e rekrutimit, që po bën ISIS-i atëherë bindesh se Shërbimi Informativ, që besojmë se nuk ka sinjalizuar, duhet jo thjesht të reformohet por duhet të bëhet një strukturë që të diktojë dhe të furnizojë vendin me informacion, kundër të keqes së madhe që na vigjëlon dhe që koha po tregon se vetë ka mbetur në radhët e fundit të shtetit shqiptar. Saqë, shpesh të vjen të thuash: Më mirë të mos jenë fare!
