Olsi Çekiçi, 44-vjeçari nga Pogradeci që theri të ëmën dhe më pas e vari tek kangjellat e shtëpisë ka dalë sot para gjykatës.
Prokuroria i kërkoi gjykatës të caktojë për 44-vjeçarin masën e sigurisë arrest me burg si dhe të vlerësonte të ligjshëm arrestimin në flagrancë. Avokati i caktuar kundërshtoi kërkesën e Prokurorisë, duke kërkuar që ndaj 44-vjeçarit të caktohej masa e sigurisë me afat 40 ditë, periudhë gjatë së cilës Çekiçi t’i nënshtrohej ekzaminimit psikik, për shkak të çrregullimeve mendore.
Ai ka shpjeguar dinamikën e ngjarjes duke pohuar autorësinë e vrasjes së nënës dhe plagosjes me mjete të forta të të vellait, i cili kishte ndërhyrë për të shpëtuar të ëmën, në momentin që 44-vjeçari po i priste kokën.
“Vëllai më goditi i pari, unë vrava nënën”, mësohet të ketë thënë në gjyq.
Gjykata hodhi poshtë pretendimet e avokatit mbrojtës dhe dha masën e arrestit me burg pa afat.
Në videot e filmuara në ambientet e gjykatës Olsi shfaqej i qetë teksa ishte në pritje të masës së sigurisë që do të jepej për të.
Çekiçi u shpreh në gjykatë se nëna e tij i kishte bërë magji dhe sipas tij ajo merrej me djallin.
g.kosovari
