Ish-deputeti i Partisë Demokratike Edmond Spaho ka reaguar publikisht duke sqaruar arsyet pse emri i tij nuk ishte përfshirë në listat e kandidatëve për Këshillin Kombëtar të Partisë Demokratike.
Spaho shprehet se pas zgjedhjeve të 11 majit 2025, të cilat i cilëson “katastrofike” për opozitën, ai ka dhënë dorëheqjen nga Kryesia, Këshilli Kombëtar dhe Sekretariati i Partisë Demokratike, duke e konsideruar këtë një akt përgjegjësie personale për humbjen elektorale.
Sipas tij, pretendimet për “vjedhje të zgjedhjeve” janë vetëm një mënyrë për të shmangur përgjegjësinë politike për rezultatin, ndërsa akuzon drejtuesit aktualë të opozitës për mungesë përgjegjësie dhe përpjekje për të ruajtur pozitat dhe privilegjet e tyre.
“Me këtë sjellje politike dhe me këtë ekip drejtues që ka PD, më kollaj shkon në Hënë se sa vjen në pushtet”, shprehet Spaho në reagimin e tij.
Ai shton se Partia Demokratike ndodhet në një nga momentet më të vështira të saj, duke akuzuar një grup brenda saj për mungesë parimesh dhe përgjegjësie politike.
Në fund të deklaratës së tij, Spaho paralajmëron se ata që, sipas tij, kanë kontribuar në këtë situatë do të mbajnë përgjegjësi për veprimet dhe pasojat politike në të ardhmen.
“Për të gjithë ata të cilët më kanë kontaktuar dhe më pyesin se përse emri im nuk ishte në listat e kandidatëve për Këshillin Kombëtar të PD.
Pas zgjedhjeve katastrofike te 11 Majit 2025, unë jam i vetmi individ në PD që jam dorëhequr nga Kryesia, Këshilli Kombëtar dhe Sekretariati i PD.
E kam marrë këtë veprim si shenjë e përgjegjësisë për humbjen e thellë që PD pësoi në këto zgjedhje duke mbetur 300 mijë vota prapa PS.
Pretendimet për “vjedhje” të zgjedhjeve janë veç maskaradë e evitimit të përgjegjësive për humbjen më të thellë të PD ka pësuar nga themelimi i saj.
Kjo maskaradë bëhet vetëm për të ruajtur postet dhe privilegjet e drejtuesve aktuale të opozitës, të cilët vazhdojnë me paturpësi të shiten si luftëtare dhe misionare të rikthimit të PD në pushtet.
Me keqardhje të thellë, por me këtë sjellje politike dhe me këtë ekip drejtues që ka PD, më kollaj shkon në Hënë se sa vjen në pushtet.
PD sot është në ditën e saj me të zezë, e mbërthyer nga një grup njerëzish pa parime e pa ndërgjegje, që interesat e tyre i kanë vënë mbi ato të vendit dhe shoqërisë.
Ata të jenë të bindur, që sado ta zgjasin bashkëpunimin me Ramën dhe agoninë e këtij regjimi, një ditë do të japin llogari për vuajtjet që kanë shkaktuar dhe vjedhjet që i kanë bërë këtij populli dhe këtij vendi”, deklaron Spaho.
