Emirjana Sako, kryetarja e Bashkisë së Durrësit është paraqitur këtë të hënë në Komisionin Hetimor për Inceneratorët. Sako tha se kur ka marrë detyrën e ka gjetur qytetin bregdetar në një situatë të vështirë nga tërmeti dhe pandemia. Ajo u shpreh se venddepozitimi i mbetjeve në Porto Romano ka qenë gangrenë për Durrësin dhe gjithë Shqipërinë. Sipas kryebashkiakes, bashkia nuk kishte fonde për ta mbyllur venddepozitimin në Porto Romano dhe kur u mor vendimi i janë drejtuar të gjitha autoriteteve për një studim fizibiliteti.
“Në Qershor patëm një kaos në qytet sa i takon depozitim të mbetjeve pasi venddepozitimi i Porto Romanos u mbyll për t’u kthyer në një park. Në këtë moment Bashkia e Durrësit depozitoi edhe në një periudhë të caktuar në Porto Romano dhe më tej u bllokua sepse depozitimet tona po pengonin dhe zhvillimin e projektit. Para se të merrej vendimi i Këshillit Bashkiak i jemi drejtuar të gjitha institucioneve qendrore për të hartuar studim fizibiliteti pasi ka një masterplan që e demarkon Shqipërinë në 10 zona. Institucionet përkatëse, AKUM, Ministria e turizmit dhe Mjedisit kanë hartuar një studim fizibiliteti që është kontraktuar KFV për këtë studim. Në bazë të këtij studimi u dorëzua materiali tek Komiteti Ndërministror duke miratuar skenarin më të përshtatshëm për bashkinë e Durrësit që ishte ai i depozitimit në landfillin e Sharrës. Pas këtij miratimi iu dorëzua materiali iu dorëzua Qarkut të Durrësit dhe qarku bën miratimin. Pas kësaj bëhet miratimi në Këshillin Bashkiak dhe më tej ne i drejtohemi ministrive përkatëse për vazhdimin e procedurës. Qyteti ndodhej në një situatë jo të mirë. Patëm një mbështetje nga landfilli i Sharrës derisa përfunduan procedurat. Ne nuk kemi hartuar marrëveshje direkte me ta, por kemi ndjekur gjithë procedurat. Marrëveshja është në bazë të Prokurimit Publik. I kemi depozituar në landfillin e Sharrës sepse ndodheshim 6 muaj pas tërmetit. Kemi pasur marrëveshjen nga lanfilli i Sharrës për t’i depozituar pa kosto pa marrëveshje”, tha Sako.
Dëshmia ka vijuar me debate më pas mes Sakos dhe kryetares së Komisionit Hetimor, Jorida Tabaku.
Emirjana Sako: Në qoftë se kjo ju vret sytë, dmth ok… (Tregon pamje nga parku i Porto Romanos)
Jorida Tabaku: Më dhembin sytë kur vidhet buxheti i shtetit. I premtuar koncensionarit të Tiranës që do t’i jepnit një kontratë 10 milionë Euro që ju la të përdornit inceneratorin e Sharrës?
Emirjana Sako: Zbatoj ligjin, nuk bëj asnjë premtim. Premtimet i kam me qytetarët e Durrësit
Jorida Tabaku: Me cilin akt keni depozituar në landfillin e Sharrës mbetjet për 1 vit?
Emirjana Sako: Me kërkesën që ju keni në dorë ku kam kërkuar mbështetje për të depozituar në një situatë… Si mendoni plehrat duhet të rrinin nëpër rrugët e Durrësit. Si mendoni?
Jorida Tabaku: Me qetësi, qetësohu!
Emirjana Sako: E qetë jam.
Jorida Tabaku: A kishit presion nga kryeministri për t’i lënë plehrat në qytetin e Durrësit që t’i çoje te landfilli i Sharrës?
Emirjana Sako: Jo, absolutisht.
Sako shtoi se Partia Demokratike ka ardhur e pa përgatitur në Komision.
“Ju i merrni shifrat nga mediat, ne i masim plehrat me peshore” – tha kryebashkiakja e Durrësit duke replikuar për shpenzimet e pretenduara nga Jorida Tabaku.
/a.r
