Partitë të vogla opozitare, LZHK, PR, PBDNJ dhe PDK po bëhen gati që të dalin së bashku në zgjedhjet e 14 majit 2023 dhe deri më tani duket se kanë rënë dakord për të dalë më kandidatë të tyre në të paktën 3 bashki.
Kreu i PBDNJ, Vangjel Dule tha per report tv se bëhet fjalë për Bashkinë e Finiqit, Dropullit dhe Himarës, ku thotë se është i bindur se partia e tij ka influencë të mjaftueshme për të fituar.
E në një kohë kur Partia Demokratike vijon të jetë e ndarë në 2 pjesë, ajo e Sali Berishës dhe Enkelejd Alibeajt, Dule thotë se do të kërkojë mbështetjen nga të dyja palët, pa asnjë dallim, pasi po bëhet me qëllimin e përbashkët për të fituar përballë socialistëve.
“Do arrihet në një marrëveshje kuadër që një të mbështesë kandidaturën e një forcë tjetër në bashki që kanë veçori të caktuara që favorizojnë njërën ose tjetër. Ne kemi influencë në 3 bashki dhe do kërkojmë forcave të tjera të opozitës pa dallim, nuk mund ‘i drejtohet njërit, dhe jo tjetrit, dhe ke detyrimin që të japësh mbështetje dhe në ato Bashki që nuk ke pretendim.
Mbështetjen duhet t’ia japësh atij që ka influencën më të madhe. Do dalim me kandidatë tanë në Bashkinë e Finiqit, Dropull dhe Himarë, tradicionalisht, jemi forcë e parë nëpërmjet forcave opozitare dhe për rrjedhojë logjika është që të kemi mbështetjen e të gjitha forcave të tjera politike dhe këtu nuk mund të bësh dallimin.
Kemi marrë kontakte me Dashamir Shehin, Agron Duka, Fatmir Mediun si edhe Nard Ndoka, jemi duke koordinuar dhe besoj se do kemi një qëndrim të unifikuar në kuadrin e opozitës në masën më të madhe të mundshme të unifikuar”, tha Dule./m.j
